Օղակաձեւ զբոսայգու 4-րդ հատվածում՝ Ալեք Մանուկյան փողոցի եւ Տ. Պետրոսյանի անվան շախմատի տան հետնամասին հարող տարածքում կտեղադրվի ազգային արժանապատվության ասպետներին նվիրված աղբյուր-հուշակոթող: Այսօր այդ որոշմանը քաղաքապետարանում տեղի ունեցած նիստում հավանություն տվեց Երեւանի ավագանին:
Որոշման հիմնավորման մեջ, մասնավորապես, ասվում է. «Հայոց ցեղասպանության վրիժառուների ժառանգների կողմից ներկայացվել է միջնորդություն Երեւան քաղաքում տեղադրել Հայոց ցեղասպանության կազմակերպիչներից վրեժ լուծած հերոս հայորդիների հիշատակը հավերժացնող խորհրդանշական հուշակոթող:
Նախագծում նշված է, որ Հայոց ցեղասպանության վրիժառուների հավաքական հուշակոթողի տեղադրման հարցն ունի քաղաքական եւ բարոյահոգեբանական կարեւոր նշանակություն. «Հայոց ցեղասպանության 100-րդ տարելիցի միջոցառումների շրջանակում 2015թ. հունվարի 29-ին Ծիծեռնակաբերդի հուշահամալիրի մոտ հրապարակվեց «Համահայկական հռչակագիրը», որով ի լուր ամբողջ աշխարհի ազդարարվում էր հայ ժողովրդի միասնական պայքարի մեկնարկը ոչ միայն Հայոց ցեղասպանության միջազգային ճանաչման ու դատապարտման, այլեւ այդ հանցագործության հետեւանքների հաղթահարման համար»:
Հարցի վերաբերյալ դրական եզրակացություններ են տվել նաեւ ՀՀ ԱԳՆ-ն եւ Երեւանի ավագանու բոլոր խմբակցությունները:
Կարդացեք նաև
Լուսինե ԲՈՒԴԱՂՅԱՆ
