Ադրբեջանի ՊՆ-ն նամակներ է ուղարկել Ռուսաստանի պաշտպանության նախարարություն եւ Արցախում խաղաղապահ ուժերի հրամանատարություն՝ կապված այլ երկրներին պատկանող մեքենաների՝ Ադրբեջանի տարածք մուտքի հետ, հատկապես այն տարածքների, որտեղ ժամանակավորապես տեղակայված են ռուս խաղաղապահները։ Ակնհայտ է, որ Ադրբեջանի այս քայլերն ուղղված են Իրանից Հայաստան մտնող բեռնատարների դեմ: Վերջին շրջանում Ադրբեջանում ակտիվ քննարկվում էր նաեւ Արցախ այդ երկրից ժամանած բեռնատարների մուտքի հարցը: Դրանցով սովորաբար հեղուկ գազ է հասցվում ՀՀ-ի եւ Արցախի Հանրապետության քաղաքացիական բնակչությանը:
Միանշանակ է, որ Ադրբեջանի այս գործողությունների թիրախում Իրանն է: Լավ իմանալով, որ Հայաստան-Իրան միջպետական ճանապարհը կենսական նշանակություն ունի Պարսկաստանի համար՝ Ադրբեջանը կոշտ եւ, ի տարբերություն սեփական հայտարարությունների, ոչ բարեկամական գործողություն է դրսեւորում վերջինիս հանդեպ: Նկատենք, որ վերջին օրերին լարվել է իրավիճակը նաեւ ադրբեջանա-իրանական սահմանին, երբ այնտեղ արձանագրվեց փոխհրաձգություն, ինչի հետեւանքով եղավ նաեւ վիրավոր:
Մյուս կողմից՝ Ադրբեջանն այդ քայլով փորձում է միջազգային հանրությանը մատուցել այն թյուր պատկերացումը, թե վերահսկում է իրավիճակը Արցախի Հանրապետությունում, ինչը նա պարբերաբար ապարդյուն արել է հակամարտության վերջին 30 տարիների ընթացքում: Պաշտոնական Բաքվի հերթական սադրանքին Արցախի Հանրապետության արձագանքը չուշացավ: ԱՀ ԱԳ նախարար Դավիթ Բաբայանը հայտարարեց, որ Արցախն Ադրբեջանի տարածք չէ, եւ վերջինս որեւէ իրավասություն չունի այնտեղ որեւէ մեկի մուտքի կամ ելքի թույլտվություն տալու։
Միեւնույն ժամանակ Ադրբեջանը խոչընդոտում է նաեւ իրանական բեռների տարանցումը Հայաստանի տարածքով՝ ստիպելով օգտվել իր տարածքի ճանապարհներից, որոնք տնտեսապես արդյունավետ չեն՝ անհամեմատ ավելի երկար լինելու պատճառով:
Կարդացեք նաև
Սա էլ իր հերթին խոսում է այն մասին, որ Բաքուն տարածաշրջանում համագործակցություն հաստատելու մասին իր հայտարարություններին տրամագծորեն հակառակ գործողություններ է իրականացնում:
Արմեն ՎԱՐԴԱՆՅԱՆ
Հոդվածն ամբողջությամբ՝ «Հայաստանի Հանրապետություն» օրաթերթի այսօրվա համարում:
