«Եթե օրինակ ինձ հարցնեին՝ ի՞նչ եք անում այս նիստերի ընթացքում, երբ քննարկվում է պարոն Ղազինյանի թեկնածության հարցը, ես այսպես կձեւակերպեի՝ գալիս ենք, պարոն Ղազինյանին տարբեր հարցեր ենք տալիս՝ իր թեկնածության հետ կապված, ձեր խմբակցությունը փորձում է թեման տանել ցանկացած այլ տեղ՝ չպատասխանելով կոնկրետ հարցերին, պարոն Ղազինյանին չենք ընտրում: Սա մեր երկուշաբթի օրերն են»,- այսօր ԱԺ պաշտպանության եւ անվտանգության հարցերի հանձնաժողովի նիստում ՔՊ պատգամավոր Վահագն Ալեքսանյանն այսպես ներկայացրեց հանձնաժողովի աշխատանքը այս նստաշրջանում:
Հիշեցնենք, որ «Հայաստան» խմբակցության պատգամավոր Արթուր Ղազինյանն այսօր երրորդ անգամ չընտրվեց ԱԺ պաշտպանության եւ անվտանգության հարցերի հանձնաժողովի փոխնախագահի պաշտոնում:
Վահագն Ալեքսանյանը հիմնավորում է, որ Ղազինյանը մեծ գումար է հայտարարագրել ու մի բան էլ ասում է, թե՝ մտածում էի՝ հայտարարագրե՞լ, թե՞ ոչ, մինչդեռ դա օրենքի պահանջ է. «Դուք, որպես փորձառու փաստաբան, այդպիսի մարդու թեկնածությանը կքվեարկե՞ք»,- դիմելով Արամ Վարդեւանյանին՝ հարցրեց Ալեքսանյանը: Նա ասաց, որ երկու չքնաղ դստեր հայր Ղազինյան անձի հետ որեւէ խնդիր չունի, բայց քաղաքական գործիչ Ղազինյանի հետ, որը տատանվում է՝ հայտարարագրի՞ գումարը, թե՞ ոչ, ինքը խնդիր ունի. «Չգիտեք իրականում այդ գումարն ինչ ընկերություններում է վաստակել, կենսագրության մեջ չկա»:
«Հայաստան» խմբակցության պատգամավոր Արամ Վարդեւանյանն ասաց, որ նախկինում էլ, հիմա էլ եղել են պաշտոնյաներ, որոնք թաքցրել են ունեցվածքը ու թերի հայտարարագրումների հետ կապված վարույթներ կան:
Կարդացեք նաև
«Հայաստան» խմբակցության պատգամավոր Ագնեսա Խամոյանն էլ իշխանությանն ասաց. «Դուք չուզելով ընտրել եք ԱԺ փոխխոսնակ, հանձնաժողովի տեղակալներ: Ինձ մոտ տպավորություն է, որ այս կերպ փորձ է արվում կաթվածահար անել հանձնաժողովի աշխատանքները եւ չքննարկել երկրի առջեւ ծառացած կարեւորագույն խնդիրները»:
Նա հարցրեց՝ ո՞րն է խնդիրը, որ չեն ընտրում՝ չհայտարարագրած գումա՞րը, թե՞ այն շիշը, որը նետել էր ԱԺ նիստերի դահլիճում:
Անդրանիկ Քոչարյանը պատասխանեց. «Շիշը վնասեց մեր երկրի անվտանգությանը, երբ որ «Հայաստան» խմբակցության ղեկավարը նետեց՝ չտիրապետելով իրեն: Պարոն Օհանյանը լավ չէր տիրապետում, որովհետեւ փուստ արեց»:
Հռիփսիմե ՋԵԲԵՋՅԱՆ
