«Ամենաթողության եւ ամեն ինչը զիջելու պարագայում, այո՛, ադրբեջանական կողմը լկտիանում է: Որոտանի կողքը՝ հենց անմիջապես ճանապարհի վրա ոստիկանական հենակետ են դրել: Համացանցում վիդեոն էլ կա: Իմ տեղեկության համաձայն, կանգնեցնում են պարսկական բեռնատարները, մարդատարներին բան չեն ասում: Բեռնատարներին կանգնեցնում են, պետտուրք ասեմ, մաքսային տուրք ասեմ՝ մուրում են ու գանձում են, դրանից հետո թողնում են, որ նրանք շարունակեն դեպի Երեւան»,- այսօր լրագրողների հետ զրույցում ասաց «Հայաստան» խմբակցության պատգամավոր Վահե Հակոբյանը:
Նա վրդովված էր, որ ԱԱԾ-ն Որոտանի փոխարեն ադրբեջանական տեղանունն էր օգտագործել. «Սա ի՞նչ է նշանակում, մեզ կամաց-կամաց ուզում են սովորեցնեն, որ դա ադրբեջանական տարա՞ծք է: Սեւ լճի տարածքում արդեն ադրբեջանական զինծառայողները պատրաստվում են ձմեռվան, որովհետեւ հիմնական կառույցներ են կառուցում»:
Վահե Հակոբյանի խոսքով՝ այսօր ավելի կարեւոր խնդիր, քան այս հարցերն են, չեն կարող լինել. «Ի՞նչ դատավոր, ի՞նչ ԲԴԽ, ի՞նչ Ջհանգիրյան: Ադրբեջանական կողմը ցանկացած պահի կարող է պարզապես կտրի Կապանը»:
Հարցին խնդրի լուծման ի՞նչ տարբերակներ է քննարկում իրենց խմբակցությունը՝ Վահե Հակոբյանը պատասխանեց, որ Նիկոլ Փաշինյանի անհապաղ հեռացումը կլուծի բոլոր խնդիրները:
Կարդացեք նաև
Հռիփսիմե ՋԵԲԵՋՅԱՆ
