ՀԱՕԿ փոխնախագահ Դերենիկ Գաբրիելյանը կանոնակարգային սահմանափակման պատճառով Օլիմպավանում երեկ կայացած ՀԱՕԿ համաժողովում դադարեցրեց իր գործունեությունը փոխնախագահի պաշտոնում: Սակայն նա միաձայն ընտրվեց ՀԱՕԿ պատվավոր փոխնախագահ:
Պարոն Գաբրիելյանը Aravot.am-ի հետ զրույցում տեղեկացրեց, որ ինքը մնում է սպորտում եւ առաջվա պես շարունակելու է իր ակտիվ գործունեությունը: «Ամբողջ կյանքս նվիրել եմ հայկական սպորտին ու չեմ պատրաստվում այսուհետեւ լինել դիտորդի դերում: Շարունակելու եմ հնարավորություններիս առավելագույն չափով օգտակար լինել, միջազգային իմ բոլոր կապերը ծառայեցնել հայկական սպորտի զարգացմանը»,-ասաց նա:
Դերենիկ Գաբրիելյանը ՀԱՕԿ համաժողովում առաջարկեց պաշտոնապես դիմել կառավարությանը, որպեսզի Աբովյան-9 հասցեում գտնվող ՀՀ սպորտի եւ երիտասարդության հարցերի նախկին նախարարության շենքը, որը դեռ 1930-ական թվականներից եղել է հայկական սպորտի խորհրդանիշերից մեկը եւ կրել ՀՀ ֆիզիկական կուլտուրայի եւ սպորտի կենտրոնական տուն անունը, վերադարձվի իր իրական տիրոջը: Նա հիշեցրեց, որ այդ շենքում են դրվել բնագավառի հիմքերն ու ավանդույթները, որ այդ շենքի աշխատասենյակներում են աշխատել, միջանցքներում քայլել հայկական եւ համաշխարհային սպորտի լեգենդներ, օլիմպիական չեմպիոններ Հրանտ Շահինյանը, Վլադիմիր Ենգիբարյանը, Իգոր Նովիկովը, որ մեր օրերում էլ, մինչեւ շենքը դատարկելը, այնտեղ մուտք ու ելք էր անում օլիմպիական խաղերի եռակի չեմպիոն, 20-րդ դարի լավագույն մարզիկ, լեգենդար Ալբերտ Ազարյանը, մեր այսօրվա օլիմպիական, աշխարհի ու Եվրոպայի չեմպիոնները: Նա նաեւ հիշեցրեց, որ Աբովյան 9 հասցեի շենքում անգամ գործել են մարզադպրոցներ, մանկական լողավազան, եղել են նաեւ ննջարաններ, որոնցում Հայաստանում գտնվելիս ապրել են համաշխարհային սպորտի մեր հայրենակից այնպիսի աստղեր, ինչպիսին է շախմատի աշխարհի 9-րդ չեմպիոն Տիգրան Պետրոսյանը:
Կարդացեք նաև
Դերենիկ Գաբրիելյանը նաեւ ընդգծեց, որ այդ հասցեում էր գործում Հայաստանի ներկայիս ազգային օլիմպիական կոմիտեն, որի օրոք Հայաստանը կրկին սկսել է ամենաբարձր հարգի մեդալներ նվաճել ամենաբարձրակարգ մրցումներում:
Համաժողովի պատվիրակները քվեարկությամբ միաձայն հավանության արժանացրին Դերենիկ Գաբրիելյանի առաջարկը եւ որոշեցին մարզաշխարհի անունից պաշտոնական նամակով դիմել կառավարություն:
Հ. Գ.Հետաքրքիր զուգադիպությամբ, երեկվա այս ահազանգից հետո այսօր Սպորտկոմիտեի շենքից կահույքը դուրս էր բերվում եւ բեռնատար մեքենաներով տարվում անհայտ ուղղությամբ:
Աշոտ ՀԱԿՈԲՅԱՆ
