Սյունիքի մարզի ընդհանուր իրավասության դատարանի դատավոր Գնել Գասպարյանի որոշմամբ՝ Գորիսի համայնքապետ Առուշ Առուշանյանի խափանման միջոց կալանքը կմնա ուժի մեջ։
Այսօր՝ սեպտեմբերի 10-ին կայացած նիստում՝ պաշտպանական կողմը միջնորդել էր կիրառել 20 մլն դրամ գրավ՝ փոխելով խափանման միջոցը։ Ամբաստանյալ Առուշ Առուշանյանը չէր ներկայացել դատարան։ Պաշտպանները հրապարակեցին նրա դիմումը, ըստ որի՝ Առուշանյանը «վատառողջ է, ծանր է տանում Երեւան–Գորիս ավտոճանապարհը»։
Կարդացեք նաև
Հիշեցնենք, որ Առուշանյանը մեղադրվում է ՀՀ քրեական օրենսգրքի 35-154 հոդվածի 4-րդ մասի 2-րդ կետով (քվեարկության գաղտնիությունը խախտելը նախապատրաստելը), 38-149 հոդվածի 2-րդ մասի 4-րդ կետով (ընտրական իրավունքի իրականացմանը խոչընդոտելը, կազմակերպելը կամ օժանդակելը, որը կատարվել է պաշտոնեական դիրքը օգտագործելով), 38-154 հոդվածով (քվեարկության գաղտնիությունը խախտելը կազմակերպելը կամ օժանդակելը):
Մեկ այլ քրեական գործով, Առուշանյանը մեղադրվում է ՀՀ քրեական օրենսգրքի 4 հոդվածներով․ 188–ի 3 մասի 1-ին կետ (ապօրինի ձեռնարկատիրությունը), 291 հոդվածի 2-րդ մաս (ընդերքի պահպանման եւ օգտագործման կանոնները խախտելը), 322 հոդվածի 2 մաս (ինքնիրավչությունը), 113 հոդվածի 2-րդ մասի 3.6 կետով (դիտավորությամբ առողջությանը միջին ծանրության վնաս պատճառելը): Գորիսի համայնքի ղեկավարից բացի, այս գործով եւս 3 ամբաստանյալ կա՝ Հարութ Լալազարյան, Էրիկ Աղաջանյան, Սամվել Դինունց։ Ամբաստանյալների նկատմամբ խափանման միջոց ընտրվել է ստորագրություն չհեռանալու մասին։ Գործը Սյունիքի ընդհանուր իրավասության դատարանի նախագահ Նապոլեոն Օհանյանի վարույթում է, եւ հերթական նիստի օրը սեպտեմբերի 30-ն է։
Առուշ Առուշանյանը մասնակցելու է հոկտեմբերի 17-ին կայանալիք Գորիսի համայնքի ավագանու ընտրություններին՝ «Առուշ Առուշանյան» դաշինքով։ Դաշինքի մեջ են «Վերածնվող Հայաստան» եւ «Ազգային օրակարգ» կուսակցությունները։
Արմեն ԴԱՎԹՅԱՆ
