Միջազգային հանրապետական ինստիտուտի (IRI) Հարցումների հետազոտության կենտրոնը հանրային կարծիքի ուսումնասիրություն է կատարել, որում ներառված են նաեւ կորոնավիրուսի համավարակի եւ պատվաստման մասին հարցերը։
Հարցմանը մասնակցել է 18 տարին լրացած 1, 504 ՀՀ քաղաքացի, ուսումնասիրություններն իրականացվել են ամբողջ ՀՀ տարածքում 2021 թվականի հուլիսի 21-ից հուլիսի 30-ն ընկած ժամանակահատվածում, հեռախոսային հարցազրույցներով։
Ըստ հրապարակած զեկույցի, հարցվածների 26%-ը կարծում է, որ քովիդի համավարակի դեմ պայքարում կառավարությունն ավելի խիստ միջոցներ պետք է կիրառի, օրինակ՝ տրանսպորտում, ռեստորաններում, սրճարաններում, գրասենյակներում եւ այլ փակ տարածքներում։ 17%-ը գտնում է, որ կառավարությունը պետք է ավելի շատ խոսի պատվաստումների մասին, 15%-ը՝ կառավարությունը չպետք է պայքարի COVID-19- ի դեմ, 7%-ը՝ վերանայել դասերի անցկացման ձեւը դպրոցներում եւ բուհերում։ Իսկ 5%-ը կարծում է, որ կառավարությունը պատվաստված մարդկանց ավելի շատ արտոնություններ պետք է տա, 3%-ը՝ թույլ տալ մուտքը որոշակի վայրեր միայն պատվաստվածներին։
Հարցվածների առաջարկած այլ տարբերակներն են՝ պատվաստումը պետք է լինի պարտադիր` 5%, դիմակ կրելու ավելի խիստ կանոններ՝ հատկապես փակ եւ բաց տարածքներում, տուգանքների ավելացում՝ 1%։
Կարդացեք նաև
Հարցին՝ ձեր կարծիքով, զանգվածային պատվաստումը կօգնի՞ վերականգնել տնտեսությունը, հարցվածների 17%-ն ասել է՝ շատ կօգնի, որոշ չափով կօգնի՝ 37%, ընդհանրապես չի օգնի՝ 26%, .աննշան կօգնի՝ 11%, հարցին դժվարացել կամ հրաժարվել է պատասխանել հարցվածների 9%-ը։
Հարցվածների 37%-ն ասել է, որ վարակվել է քովիդով, 61%-ը՝ ոչ, հարցին դժվարացել կամ հրաժարվել է պատասխանել 2%-ը։
Հարցին՝ պատվաստվե՞լ եք COVID-19-ի դեմ, զեկույցում ներառված է միայն «այո» պատասխանները, այն 8% է։
Հետազոտության համաձայն, հարցվածների 32%-ը շատ մտահոգված է, որ ինքը կամ ընտանիքի անդամներն ու մտերիմները կարող է վարակվեն քովիդով, որոշ չափով մտահոգված է 39%-ը, որոշ չափով մտահոգված չէ 6%-ը։ Հարցվածների 22%-ը նշել է, որ ինքն ու ընտանիքի անդամները կանխարգելիչ միջոցառումներ են ձեռնարկում, 22%-ը վտանգ չի տեսնում իր եւ ընտանիքի համար, 19%-ն ասել է՝ այս ամենը դավադրություն է, դա կեղծ վիրուս է։ Իսկ 16%-ը համարում է, որ քովիդն ավելի վտանգավոր չէ, քան սովորական գրիպը, 11% -ն ասել է՝ ես եւ իմ ընտանիքն արդեն վարակվել ենք, 4%-ը նշել է, որ ինքն ու ընտանիքը պատվաստվել են COVID-19-ի դեմ։
Ուշագրավ են ցուցանիշները պատվաստվելու պատրաստակամության մասին հարցին։ Հարցվածների ընդամենը 14%-ն է պատասխանել՝ վստահաբար այո, պատվաստվելու եմ, 32%-ը պատասխանել է՝ վստահաբար ոչ, հավանաբար ոչ՝ 21%-ը, հավանաբար այո՝ 29%-ը։
Հարցին՝ որքանո՞վ եք համաձայն, որ պատվաստումը արդյունավետ է եղել կամ կլինի արդյունավետ ձեզ համար, հարցվածների 14%-ն ասել է՝ լիովին համաձայն եմ, 38%-ը նշել է՝ մասամբ համաձայն եմ, ընդհանրապես համաձայն չեմ՝ 27%, մասամբ համաձայն չեմ՝ 12%։
Հարցվածների 38%-ին շատ են մտահոգում կորոնավիրուսի նոր տեսակները, 31%-ին՝ հիմնականում մտահոգում են, ընդհանրապես չեն մտահոգում 21%-ին, հիմնականում չեն մտահոգում 9%-ին։
Թե որքանո՞վ պատվաստումը կարող է կանխել կորոնավիրուսի նոր տեսակների տարածումը, հարցվածներրի 13%-ն այս հարցին պատասխանել է՝ լիովին կարող է կանխել, 55%-ը՝ հիմնականում կարող է կանխել, 7%-ը՝ ը ընդհանրապես չի կարող կանխել, 14%-ը՝ հիմնականում չի կարող կանխել։
Պատվաստված քաղաքացիների 84%-ը նշել է, որ պատվաստվելու որոշում է կայացրել առողջության մասին մտահոգվելով, 9%-ը նշել է, որ պատվաստվել է արտերկիր մեկնելու համար:
Ինչու՞ հիմնականում կամ ընդհանրապես չեք վստահում հետեւյալ պատվաստանյութերին. այս հարցին ի պատասխան (նրանք, ովքեր չեն վստահում պատվաստանյութին) ռուսական Sputnik V-ի դեպքում հարցվածների 44%-ը նշել է, որ վախենում է պատվաստանյութի կողմնակի ազդեցություններից, չինական Sinovac կամ CoronaVac-ի դեպքում՝ 35%-ը, բրիտանական AstraZeneca-ի դեպքում՝ 62%-ը։ Ընդ որում, Sputnik V-ի համար հարցվածների 18%-ը նշել է, որ չկա ծավալի տեղեկատվություն, չինական Sinovac կամ CoronaVac-ի համար 23%-ն է նշել, որ չկա բավարար տեղեկատվություն, նույն բանն ասել է հարցվածների 13% -ն AstraZeneca-ի մասին։
Պատրաստեց՝
Նելլի ԲԱԲԱՅԱՆԸ
«Առավոտ» օրաթերթ
07.09.2021
