Սյունիքի մարզի ընդհանուր իրավասության դատարանում դատավոր Գնել Գասպարյանի նախագահությամբ մեկնարկեց փոխգնդապետ Անդրանիկ Վերանյանի դատավարությունը։ Ըստ «Դատալեքս»-ի, նա, հանդիսանալով Ն զորամասի հրամանատարի՝ մարտական պատրաստության գծով տեղակալ, այսինքն` հրամանատար, Հայաստանում հայտարարված ռազմական դրության պայմաններում անձնական շահագրգռվածությունից ելնելով՝ չարաշահել է իր պաշտոնեական դիրքը, որը անզգուշությամբ նյութական ծանր հետեւանքներ է առաջացրել: Վերանյանը հոկտեմբերի 9-ին՝ վերադասից հրաման է ստացել, զորամասերի անձնակազմին Հորադիսի շրջանից տեղափոխել Տիլի գյուղ:
Իշխանաձորում, զորամասի հրամանատարի մարտական պատրաստության գծով տեղակալ փոխգնդապետ Վերանյանը նկատել է, որ վաշտի անձնակազմը տեղափոխող «Ուրալ»-ը կանգնած է , իսկ անձնակազմը ցրված: Իր մոտ է հրավիրել վաշտի հրամանատարի։ Վերջինս տեղեկացրել է, որ անօդաչու սարքի ձայն են լսել եւ ինքը հրաման է տվել ցրվել տարածքում՝ պառկելով գետնին: Ըստ մեղադրանքի , չնայած Վերանյանն էլ է լսել ԱԹՍ-ի ձայնը, բայց հրամայել է անձնակազմին նստեցնել ավտոմեքենան եւ շարունակել ճանապարհը՝ նշելով, որ ԱԹՍ-ն ոչ թե իրենց , այլ հակաօդային պաշտպանության զորքերի խնդիրն է ։ 19 զինծառայողները նստել են մեքենան ու շարժվել, 5 րոպե անց ԱԹՍ-ն հարվածել է «Ուրալին», որի պատճառով զոհվել է 18 զինծառայող, իսկ մեկը ստացել է մարմնական վնասվածքներ:
Անդրանիկ Վերանյանը մեղադրվում է ՀՀ քրեական օրենսգրքի 375 հոդվածի 4-րդ մասի հատկանիշներով (Իշխանությունը չարաշահելը, իշխանազանցությունը կամ իշխանության անգործությունը, որոնք կատարվել են ռազմական դրության, պատերազմի ժամանակ կամ մարտի պարագաներում՝): Նրա նկատմամբ խափանման միջոց է ընտրվել՝ ստորագրություն չհեռանալու մասին, նա մեղադրանքը չի ընդունել։
Կարդացեք նաև
Նիստի սկզբում, տուժողների իրավահաջորդները դատարանին միջնորդություն ներկայացրեցին՝ ընդդատության կարգով փոխել քրեական գործը տեղափոխել Երեւանի ընդհանուր իրավասության դատարան, չնայած տուժողները Հայաստանի տարբեր մարզերից են։ Պաշտպան Նորիկ Նորիկյանը նախ ցավակցեց բոլոր զոհվածների հարազատներին։ «Խոնարհվում եմ նրանցից յուրաքանչյուրի լուսավոր հիշատակի առաջ։ Պաշտպանական կողմը ամեն ինչ կանի, որ ճշմարտությունը բացահայտվի»,–ասաց Ն․Նորիկյանը։
Ըստ պաշտպանի՝ գործող օրենքով, ընդդատությունը որոշելիս, դատարանն անպայման պետք է հաշվի առնի մեղադրյալի տեսակետը։, ըստ որի, եթե մեղադրյալը առարկում է, ապա դատարանը պետք է մերժի միջնորդությունը։ «Իմ պաշտպանյալի համար էլ որեւէ տարբերության չկա, թե գործը որ դատարանում կքննվի։ Ցանկացած տեղ, որտեղ կնշեն տուժողների իրավահաջորդները, մենք շահագրգռված ենք պարզելու ողջ եղելությունը»,-ասաց Նորիկյանը։
Դատավոր Գնել Գասպարյանը խորհրդակցական սենյակից վերադառնելուց հետո հրապարակեց դատարանի որոշումը՝ ընդդատության կարգով քրեական գործը տեղափոխել Երեւանի ընդհանուր իրավասության դատարան։
Արմեն ԴԱՎԹՅԱՆ
