ԲԴԽ-ում սեպտեմբերի 6-ին շարունակվեց Կոռուպցիայի կանխարգելման հանձնաժողովի կողմից ներկայացված՝ Վերաքննիչ քաղաքացիական դատարանի դատավոր Գագիկ Խանդանյանի կողմից «Հանրային ծառայության մասին» օրենքի 31-րդ հոդվածի 1-ին մասի և «Հայաստանի Հանրապետության Դատական օրենսգիրք» սահմանադրական օրենքի 5-րդ հոդվածի 1-ին մասի պահանջները խախտելու վերաբերյալ միջնորդության քննությունը:
Կարգապահական վարույթի հիմքում այն հանգամանքն է, որ դատավորն, ըստ Հանձնաժողովի, խախտել է «Հանրային ծառայության մասին» օրենքի 31-րդ հոդվածի 1-ին մասի և «Հայաստանի Հանրապետության Դատական օրենսգիրք» սահմանադրական օրենքի 5-րդ հոդվածի 1-ին մասի պահանջները։
Դատական նիստի ընթացքում Կոռուպցիայի կանխարգելման հանձնաժողովի անդամ Նարեկ Համբարձումյանը ներկայացրեց միջնորդությունը ու հայտարարեց. «Հանրային ծառայողը պաշտոն ստանձնելուց հետո իրավունք չունի, առկա է բացարձակ արգելք առհասարակ ձեռնարկատիրական գործունեությամբ զբաղվելու հարցում: Կարգավորումը տալիս է Հանրային ծառայության մասին օրենքը: Հանձնաժողովը գտել է,որ Գագիկի Խանդանյանի արարքում առկա է կանոնների խախտում և տվել է եզրակացություն, որը օրենքով սահմանված կարգով ուղարկվել է խորհրդին»:
Նա, մասնավորապես ասաց. «2020-ի մայիսի 4-ին Արամ Բաբայանը, Մխիթար Սարգսյանը կնքել են «Մուշ» ՍՊԸ-ի իրենց բաժնեմասի առուվաճառքի պայմանագիր, որով որպես գնորդ հանդիսացել է Գագիկ Խանդանյանը։ Պայմանագրի կնքումից հետո ընկերության միակ մասնակից Խանդանյանը կայացրել է որոշում՝ կանոնադրական փոփոխություն կատարելու և իրեն որպես միակ մասնակից գրանցելու մասին: Նրա որոշմամբ փոխվել է նաև կազմակերպության գործադիր մարմնի կազմը, որի հիման վրա պետռեգիստրում դիմում է ներկայացվել»:
Կարդացեք նաև
Գագիկ Խանդանյանի նկատմամբ կարգապահական վարույթ հարուցելու առիթ է հանդիսացել արդարադատության նախարարության իրավաբանական անձանց ռեգիստրի գործակալության պետի ժամանակավոր պաշտոնակատար Տ.Մկրտչյանի կողմից էլեկտրոնային փաստաթղթաշրջանառության «Մալբրի» համակարգի միջոցով Կոռուպցիայի կանխարգելման հանձնաժողովին հասցեագրված դիմումը։ Ուսումնասիրելով վերոնշյալ դիմումը՝ Կոռուպցիայի կանխարգելման հանձնաժողովը վարույթ է հարուցել անհամատեղելիության պահանջների առերևույթ խախտման հիմքով։
Նարեկ Համբարձումյանը նաև պնդեց՝ Գագիկ Խանդանյանի կողմից միանձնյա որոշում է կայացվել իրեն նշանակել կազմակերպության տնօրեն. «Հանրային ծառայության պաշտոն ստանձնած անձը կազմակերպության՝ իր բաժնեմասերը հավատարմագրման կառավարման հանձնելով, մասնակցել էր ընկերության ժողովին: Այսինքն՝ կառավարչական գործունեություն էր իրականացրել՝ տնօրենի ժամանակավոր պաշտոնակատար էր նշանակել: Սույն պարագայում ևս դիտարկել ենք անհամատեղելիության կանոնի խախտում»:
Ի պատասխան Գագիկ Խանդանյանի պաշտպանների հարցին՝ ի՞նչն է արգելում օրենքը՝ բաժնեմաս ձեռք բերե՞լը, թե՞ մասնակցությունը, Նարեկ Համբարձումյանը պատասխանեց. «Բաժնեմաս ձեռք բերելն արդեն նշանակում է մասնակցություն: Օրենսդրությամբ չկա արգելող նորմ, որը կարգելի բաժնեմաս ձեռք բերելը, միևնույն ժամանակ ասում է, եթե հանրային պաշտոն ես ստանձնում, քո ունեցած բաժնեմասը տուր հավատարմագրային կառավարման»:
ԲԴԽ նախագահ Գագիկ Ջհանգիրյանը որոշեց նիստը հետաձգել՝ այլ նիստի՝ նախապես նշանակված լինելու հիմքով: Հաջորդ դատական նիստը տեղի կունենա սեպտեմբերի 13-ին՝ ժամը 15.20-ին:
Տաթև ՀԱՐՈՒԹՅՈՒՆՅԱՆ
