Ռուսաստանն ու Ադրբեջանը քննարկում են լրացուցիչ իրավական մեխանիզմներ՝ կապված Ղարաբաղում ռուս խաղաղապահների մանդատի հետ: Այս մասին հայտարարել է Ադրբեջանի նախագահի օգնական Հիքմեթ Հաջիևը:
«Ինչ վերաբերում է ռուս խաղաղապահների մանդատի վերաբերյալ լրացուցիչ համաձայնագրերին և լրացուցիչ իրավական մեխանիզմներին, կողմերի միջև այդ ուղղությամբ ընթանում են նախնական շփումներ, և որոշակի քննարկումներ դեռ շարունակվում են»,- ասել է Հաջիևը BBC-ի ադրբեջանական ծառայությանը տված հարցազրույցում:
Նա ընդգծել է, որ Ղարաբաղում ռուս խաղաղապահները գործողություններն իրականացվում են նոյեմբերի 10-ին ստորագրված եռակողմ հայտարարության համաձայն, որով սահմանվել են խաղաղապահների «քաղաքական և որոշակի առումով նաև իրավական շրջանակները»:
«Ամբողջ Ղարաբաղն Ադրբեջանի ինքնիշխան տարածք է, միջազգային հանրությունը ճանաչում է Ադրբեջանի տարածքային ամբողջականությունն ու ինքնիշխանությունը, և համաձայն նոյեմբերի 10-ի հայտարարության՝ ժամանակավոր տեղակայվել են խաղաղապահ ուժեր Ադրբեջանի Ղարաբաղ շրջանի որոշ հատվածներում»,- ասել է Հաջիևը:
Կարդացեք նաև
Նա նաև նշել է, որ այս պահին իրենց վերահսկողության տակ անցած տարածքներում վերականգնման ակտիվ աշխատանքներ են ընթանում:
Պատրաստեց Վիկտորյա ԱՆԴՐԵԱՍՅԱՆԸ
