Ռուսաստանը միշտ հանդես է եկել հայ-թուրքական հարաբերությունների կարգավորման օգտին, և վերջին դրական ազդակների փոխանակումն էլ Երևանի ու Անկարայի միջև գրանցել է և ընդունել ի գիտություն: Այս մասին այսօր տեղի ունեցած ճեպազրույցում հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան:
«Նախկինում մենք անմիջականորեն մասնակցել ենք համապատասխան միջնորդական ջանքերին, նպաստել ենք Ցյուրիխում 2009թ. այսպես կոչված «ցյուրիխյան արձանագրությունների» ստորագրմանը»,- հիշեցրել է Զախարովան՝ հավելելով, որ դրանք նախատեսում էին Հայաստանի և Թուրքիայի միջև հարաբերությունների փուլային կարգավորում, և Ռուսաստանն այդտեղ գործուն և արդյունավետ դերակատարություն է ունեցել:
Միաժամանակ Զախարովան նշել է, որ կողմերն այդպես էլ չիրականացրին Ռուսաստանի միջնորդությամբ ձեռք բերված պայմանավորվածությունները, չնայած որ դա յուրաքանչյուր պետության կամքն է:
«Մենք հիմա էլ պատրաստ ենք նպաստել երկու հարևան երկրների մերձեցմանը՝ հիմնված փոխադարձ հարգանքի և միմյանց շահերը հարգելու վրա»,- ասել է նա:
Կարդացեք նաև
Զախարովան նաև նշել է, որ Մոսկվան ելնում է նրանից, որ հայ-ադրբեջանական հարաբերությունների կարգավորմանը զուգընթաց Երևանի և Անկարայի հարաբերությունների կարգավորումը կարող է նպաստել տարածաշրջանում խաղաղության, կայունության և բարգավաճման:
Ինչ վերաբերում է «վեցյակի հարթակին»՝ Ռուսաստանի ԱԳՆ ներկայացուցիչն ասել է, որ այդ ձևաչափը կարող էր բխել բոլոր պոտենցիալ մասնակիցների շահերից և իր ներդրումն ունենալ Հարավային Կովկասում խաղաղության և վստահության ամրապնդմանը, տնտեսական գործակցության խթանմանը:
Պատրաստեց՝ Վիկտորյա ԱՆԴՐԵԱՍՅԱՆԸ
