ԿԳՄՍ նախարար Վահրամ Դումանյանը երեկ, ինչպես տեղեկացրել ենք, այցելել էր սահմանամերձ համայնքների դպրոցներ, այդ թվում՝ Սոթքի դպրոց:
Դպրոցի ուսուցչուհի, հասարակագիտություն եւ եկեղեցու պատմություն դասավանդող Բելլա Մարտիրոսյանը մեզ հետ զրույցում ասաց, որ շատ վիրավորվել է նախարարի այդ այցից. «Հարգելիներս, փոխնախարարը, նախարարը որ գալիս են դպրոց, գուցե իրենք լսեին, թե ուսուցիչն ի՞նչ խնդիրներ ունի: Եկան, ինտերվյու տվին ու գնացին, մի հատ չլսեցին՝ ուսուցի՛չ, դու ի՞նչ խնդիր ունես ընդհանրապես, սահմանամերձ գյուղի բնակիչ ես: Դա վիրավորական է, հասկանո՞ւմ եք: Մենք էլ մարդ ենք: Որ մենք նախարարի պաշտոնում չենք, չի նշանակում, որ մենք մարդ չենք: Պաշտոնում լինելը մարդու չափանիշ չի»:
Խոստացանք ուսուցչուհու ասելիքը տեղ հասցնել, հորդորեցինք ներկայացնել, թե ինչ խնդիրներ ունեն, Բելլա Մարտիրոսյանը արձագանքեց. «Մենք ոչ մի խնդրի չենք բախվում, ամուր կանգնած ենք մեր սահմանի վրա ու կանգնելու ենք: Մարդն այսպես թե այնպես մահկանացու է, բայց երբ պետությունն է մահանում, երբ ժողովրդի հավատն է մահանում պետության հանդեպ… ա՛յ, այստեղ արդեն պետությունը կործանման առաջ է կանգնած»:
Ավելի ուշ, երբ նախարարին փոխանցեցինք, որ ուսուցչուհին իրենից վիրավորվել է, Վահրամ Դումանյանն ասաց, որ ինքը պատրաստ էր հանդիպել, բայց դպրոցի տերը տնօրենն է, նա պետք է կազմակերպեր:
Կարդացեք նաև
Հռիփսիմե ՋԵԲԵՋՅԱՆ
