«Որոշակի գործընթաց կա՝ ոչ հրապարակային։ Բացառված է, որ հենց այնպես ՀՀ ղեկավարը հայտարարություն աներ, արձագանքեր Թուրքիայի նախագահը։ Պարզ է, որ կա ոչ հրապարակային գործընթաց, դա միանշանակ է»,-«Մեդիա կենտրոնի» առցանց քննարկման ժամանակ այսօր, անդրադառնալով ՀՀ վարչապետ Նիկոլ Փաշինյանի այն հայտարարությանը, թե Թուրքիայի կողմից դրական ազդակներ կան՝ ասաց քաղաքագետ Բենիամին Պողոսյանը։
Նա հիշեցրեց, որ 2008-2009թթ․ «ֆուտբոլային դիվանագիտությունը» նախորդող գործընթացներ ուներ․ «Հիմա մենք նույն՝ նախորդող փուլում ենք, եւ ոչ հրապարակային քննարկումներ կան․ կողմերը գտնում են, որ ժամանակն է քննարկումները հրապարակայնացնելու։ Ինչո՞ւ է Թուրքիան հիմա ուզում սկսել հարաբերությունների կարգավորման գործընթաց։ Երկու պատճառ կա»։
Ըստ Պողոսյանի․ «Նախ, Թուրքիան միշտ էլ ուզել է Հարավային Կովկասում ունենալ առավել մեծ ազդեցություն։ Նա հասկանում է, որ ՀՀ-ի հետ հարաբերությունների բացակայությունը խոչընդոտ է։ ՀՀ-ի հետ հարաբերությունների լավացումը կնպաստի Հարավային Կովկասում Թուրքիայի ազդեցության մեծացմանը։ Երկրորդ, կարծում եմ, Թուրքիան հույս ունի, որ հարաբերությունների նորմալացումը կհանգեցնի նաեւ տնտեսական հարաբերությունների հաստատմանը, ինչը կբերի թուրքական տնտեսության ներգրավվածությանը ՀՀ-ում։ Սա էլ Թուրքիայի համար կստեղծի տնտեսական լծակներ, որոնք անհրաժեշտության դեպքում կարող են օգտագործվել ՀՀ-ի հանդեպ այս կամ այն ճնշումը գործադրելու համար։ Հարց կհնչի, թե ինչո՞ւ է հիմա Թուրքիան ուզում նորմալացնել մեր հետ հարաբերությունները։ Մինչեւ պատերազմն Արցախի հարցում կար այլ «ստատուս քվո»։ Առանց հօգուտ Ադրբեջանի «ստատուս քվո»-ի փոփոխության՝ ՀՀ- Թուրքիա հարաբերությունների գործընթացը կհանգեցներ խնդիրների՝ Թուրքիա-Ադրբեջան հարաբերություններում։ Այս պատճառով 2008-09թթ․ գործընթացը մեզ որեւէ լուրջ տեղ չտարավ, իսկ հիմա, Թուրքիայի գնահատմամբ, ՀՀ-Ադրբեջան տիրույթում Արցախի հարց այլեւս չկա»։
Լուիզա ՍՈՒՔԻԱՍՅԱՆ
