«Կառավարության ծրագրի շուրջ, անկախ նրանից, թե ինչպիսի դիրքորոշում ունենք գործադիրի հանդեպ, բովանդակային քննարկում, որպես այդպիսին, չեղավ։ Ավելի շատ ամեն ինչ տեղափոխվեց անձնական վիրավորանքների, ֆիզիկական հաշվեհարդարի փորձերի դաշտ, եւ արդյունքում կառավարության ծրագիրը հաստատվեց միայն իշխող խմբակցության ձայներով»,-«Մեդիա կենտրոնի» առցանց քննարկման ժամանակ այսօր անդրադառնալով կառավարության ծրագրի քննարկման ժամանակ ՀՀ ԱԺ-ում գրանցված միջադեպերի փաստին՝ ասաց քաղաքագետ Բենիամին Պողոսյանը։ «Սա իհարկե սպասելի էր, բայց եթե դիտարկենք արտաքին քաղաքականության մարտահրավերները, ապա կա մեկ հիմնական, խորքային խնդիր։ Կառավարությունն ասում է, թե տարածաշրջանում խաղաղության հաստատման մանդատ է ստացել։ Նախ, ես կվիճարկեի «տարածաշրջան» բառը»,-նշեց նա։
Քաղաքագետի խոսքով․ «Անգամ ամենափոքր մասշտաբներով՝ տարածաշրջանը Հարավային Կովկասն է, որտեղ միայն հայ-ադրբեջանական հակամարտությունը չէ։ Կա նաեւ ռուս-վրացական հակամարտություն։ Ուստի պնդել, որ ընտրողների մեծ մասը ՀՀ կառավարությանը մանդատ է տվել, որպեսզի վերջինս լուծի ՌԴ-Վրաստան հարաբերությունները, խաղաղություն հաստատի, չեմ կարծում։ Այսինքն, առնվազն պետք է ասել, որ ՀՀ-ի եւ Ադրբեջանի միջեւ խաղաղություն հաստատելու մանդատ են ստացել։ Սակայն այստեղ երկրորդ խնդիրը կա՝ տարածաշրջանում ներգրավված երկրորդ ուժերը խաղաղության չեն պատրաստվում։ Ադրբեջանը շարունակում է մեծածավալ զինտեխնիկայի գնումը եւ դա չի թաքցնում, իսկ Թուրքիան ակտիվ է տարբեր տարածաշրջաններում՝ իր քաղաքականությունը հենելով կոպիտ ուժի կիրառման վրա։ ՌԴ-ն էլ այստեղ պատերազմից հետո ավելացրել է իր ռազմական ներկայությունը։ ՀՀ կառավարությունն ինքն է խնդրում ՌԴ-ին՝ հավելյալ սահմանապահներ տեղակայել հայ-ադրբեջանական սահմանին։ Ուստի անհամապատասխանություն կա»։
Բենիամին Պողոսյանի բնորոշմամբ․ «Անգամ, եթե խոսում են վերոնշյալ մանդատի մասին, ապա տարածաշրջանի մյուս խաղացողների առնվազն հրապարակային հայտարարություններն ու գործողությունները չեն վկայում այն մասին, որ նրանք խաղաղության են պատրաստվում։ Միակողմանի խաղաղություն չի լինում։ Ինչքան էլ ՀՀ-ն հայտարարի, որ պատրաստվում է Ադրբեջանի հետ խաղաղություն հաստատել, վերջինս չունի նման մտադրություն։ Չորս ամիս է՝ վերջինս գրավել է ՀՀ որոշ տարածքներ ու անընդհատ լարվածություն է պահում սահմանին։ Ես չեմ բացառում, որ քվեարկությանը մասնակցածների մեծամասնությունը ցանկանում է խաղաղ ապրել Ադրբեջանի հետ։ Առհասարակ, որեւէ մեկը պատերազմ չի ուզում, բայց միայն ՀՀ կառավարության բարի մտադրությամբ խաղաղություն չի լինում»։
Լուիզա ՍՈՒՔԻԱՍՅԱՆ
