Կառավարության այսօրվա նիստում առողջապահության նախարար Անահիտ Ավանեսյանը ներկայացրեց կորոնավիրուսի համավարակի իրավիճակը։ Երեկ կատարվել է 6394 թեստավորում, որից հաստատվել է կորոնավիրուսային հիվանդության 636 նոր դեպք, մահվան դեպքերը՝ 19:
«Ինչպես մի քանի անգամ ահազանգել ենք, դելտա շտամը աչքի է ընկնում վարակելիության ավելի մեծ աստիճանով, հիվանդության ընթացքն ավելի ծանր է։ Նկատում ենք հիվանդացության երիտասարդացում։ Նախորդ շաբաթ ես հրապարակել էի, որ ունենք 20 եւ 28 տարեկան երիտասարդներ, ցավոք նրանցից մեկը մահացել է։ Այս պահին ունենք 18 տարեկան երիտասարդ, որը վերակենդանացման բաժանմունքում է»,-ասաց նախարարը։
Նրա ներկայացմամբ՝ քովիդ բուժող վերապրոֆիլավորված հիվանդանոցներում ծավալված 1600 մահճակալից 1400-ը զբաղված են, ծանր վիճակում են 650 քաղաքացիներ, ծայրահեղ ծանր՝ 126 , արհեստական շնչառական ապարատներին միացված է 51 քաղաքացի։
«Այս պահին հոսպիտալացումներ են ընթանում, հերթեր չկան, ծավալվում են նոր մահճակալներ, բայց սա շատ մեծ լարվածություն է ստեղծում համակարգում։ Ընդհանուր առմամբ աշնանը հիվանացության աճ է գրանցվում, մարդիկ ավելի շատ են դիմում շտապ օգնությանը, հիվանդանոցներին, ուստի քովիդը պահել հնարավորինս կառավարելի շրջանակներում, նշանակում է նաեւ նպաստել այլ հիվանդություններով քաղաքացիներին ճիշտ ժամանակին բժշկական օգնություն ցույց տալ», -նշեց տիկին Ավանեսյանը։
Կարդացեք նաև
Այս պահին 293955 քաղաքացի պատվաստվել է, նախարարն ասաց, որ պատվաստումների օրական ցուցանիշը 6 հազարն անցել է եւ նկատվում է շատ մեծ հետաքրքրվածություն եւ հոսք․«Եթե մարտին հարցվածների միայն 10%-ն էր հնարավոր համարում պատվաստումը, վերջերս իրականցված հարցումներով՝ 40%- ից ավելին պատվաստումը դիտարկում են կարեւոր գործիք եւ պատրաստ են պատվաստվել»։
Նելլի ԲԱԲԱՅԱՆ
