Հարգելի՛ հայրենակիցներ,
1988 թվականին սկիզբ առած ղարաբաղյան շարժումը շարունակությունն էր այն նվիրական պայքարի, որ դարերով մղել է հայ ժողովուրդը իր ազատ և անկախ կյանքը կերտելու իրավունքի համար։
1991թ. սեպտեմբերի 2-ին հռչակված Լեռնային Ղարաբաղի (Արցախի) Հանրապետությունը հայության երազանքի իրագործումն էր։
Իր ծննդյան հենց առաջին պահից արցախյան պետականությունը հարկադրվելով անցնելու կենաց և մահու գոյամարտի միջով՝ պայքարեց անձնվեր ու հերոսաբար և արձանագրեց հաղթական արդյունք։
Արցախում սկիզբ առան ավերված երկրի վերականգնման լայնածավալ աշխատանքներ, ձևավորվեցին արժանապատիվ ապրելու և արարելու պայմաններ։
Կարդացեք նաև
Սակայն չհամակերպվելով Արցախում հայկական պետականության գոյության փաստի հետ՝ թշնամին հետ չէր կանգնում այն ոչնչացնելու փորձերից և աստիճանաբար մեծացնելով ճնշումը՝ անցավ բացահայտ հարձակողական գործողությունների։ Դրանց գագաթնակետը 2020 թվականի 44-օրյա պատերազմն էր՝ մեզ բոլորիս հայտնի աղետալի հետևանքներով։
Վիրավոր Արցախի վերածննդի համար այսօր ևս անհրաժեշտ է համայն հայության միասնական ջանքերի ներդնումը։ Ամեն հայի սրտում պետք է անընդհատ հնչի մեր սուրբ հողի կանչը՝ ամբողջ զորությամբ սատարել և նեցուկ կանգնել Արցախին։
Փառք ու պատիվ հանուն Արցախի, հանուն անկախության ու խաղաղության զոհված մեր բոլոր հերոսներին։
Շնորհավո՛ր Արցախի Հանրապետության հռչակման 30-րդ տարեդաձը։
Վ․ ԲԱԼԱՍԱՆՅԱՆ
