Ermenihaber. Թուրքիայի ընդդիմադիր քրդամետ «Ժողովուրդների դեմոկրատական» կուսակցության (ԺԴԿ-HDP) հայ պատգամավոր Կարո Փայլանը մեջլիսի օրակարգ է բերել փոքրամասնություններին՝ այդ թվում նաև հայկական համայնքին պատկանող հիմնադրամների ղեկավարների ընտրության հարցը։
Հայ պատգամավորն ընդգծել է, որ 2013թ․ հունվարի 19-ին փոքրամասնությունների հիմնադրամների ընտրությունները կարգավորող կանոնակարգի չեղարկումից հետո համայնքները փաստացիորեն չեն կարողանում ընտրություններ կազմակերպել։ Այդ ութ տարիների ընթացքում իշխանությունները պարբերաբար խոստացել են լուծում գտնել, բայց այդպես էլ որևէ քայլ չեն ձեռնարկել։
Թուրքիայի նախագահ Ռեջեփ Թայիփ Էրդողանը մարտի 2-ին հայտարարել է, թե Հիմնադրամների կանոնակարգը վերանայվում է՝ փոքրամասնություններին հիմնադրամների ղեկավարների ընտրությունների հնարավորություն ընձեռելու նպատակով։ Բայց մինչ օրս որևէ արդյունք չկա։
Հայկական համայնքի որոշ հիմնադրամներ օրերս դիմել են Թուրքիայի Հիմնադրամների գլխավոր վարչություն՝ հոկտեմբերի 3-ին հիմնադրամների ղեկավարների ընտրություն կազմակերպելու թույլտվության խնդրանքով։ Սակայն, վարչությունից պատասխանել են, որ 2019թ․ մի շրջաբերականի համաձայն՝ մահացած կամ պաշտոնից հրաժարված ղեկավարների փոխարեն համայնքային հիմնադրամների նոր ղեկավարները նշանակվում են, այլ ոչ թե ընտրվում։
Կարդացեք նաև
Այս առնչությամբ Կարո Փայլանը Թուրքիայի փոխնախագահ Ֆուաթ Օքթային հղել է հետևյալ հարցերը․
1․ Ձեր իշխանությունը, որ ամեն հարմար առիթով ընտրություններ է կազմակերպում, ինչո՞ւ է ութ տարի շարունակ խոչընդոտում փոքրամասնությունների համայնքների ընտրություններին։
2․ Ինչո՞ւ թույլ չեք տալիս, որ փոքրամասնությունների համայնքները ընտրություններ անցկացնեն, թեև բազմաթիվ անգամ նման խոստում եք տվել։
3․ Ե՞րբ են անցկացվելու փոքրամասնությունների հիմնադրամների ընտրությունները։
4․ Դուք գիտակցո՞ւմ եք, որ թույլ չտալով փոքրամասնությունների հիմնադրամների ընտրություններ կազմակերպել՝ խոչընդոտում եք այդ հիմնադրամների արդյունավետ կառավարմանը։
