Ինֆորմացիայի ազատության կենտրոնի ղեկավար Շուշան Դոյդոյանն այսօր ԱԺ-ում լրագրողների գործունեության սահմանափակումների վերաբերյալ քննարկմանը առաջարկություններով էր եկել:
Նա առաջարկում է սահմանել, որ ՀՀ ԱԺ-ում հավատարմագրման ներկայացվող լրագրողն անպայման ունենա առնվազն 2 տարվա մասնագիտական աշխատանքային փորձ: Երկրորդ առաջարկն այն է, որ ԱԺ-ում հավատարմագրեն միայն այն ԶԼՄ-ների լրագրողներին, որոնք ընդունել են մասնագիտական վարքագծի՝ էթիկայի կանոնագիր: Եվ երրորդ առաջարկն է թույլատրել, որ ԱԺ-ում հավատարմագրված լրագրողն իր մասնագիտական գործունեությունն ազատորեն իրականացնի ԱԺ-ի ամբողջ տարածքում, բոլոր մասնաշենքերում՝ աշխատանքային բոլոր օրերին, նաեւ՝ օթյակում՝ ինչպես ԱԺ լիագումար նիստի, այնպես էլ ընդմիջման ընթացքում:
Հիշեցնենք, որ այսօր խորհրդարանում ԱԺ մարդու իրավունքների եւ հանրային հարցերի հանձնաժողովի նախագահ Թագուհի Թովմասյանի նախաձեռնությամբ քննարկում էր կազմակերպվել՝ ԱԺ-ում լրագրողների գործունեության սահմանափակումների վերաբերյալ:
Հայաստանի ժուռնալիստների միության նախագահ Սաթիկ Սեյրանյանը Շուշան Դոյդոյանի առաջարկությունները չընդունեց: Նա նշեց, որ էթիկայի կանոնագիր ստորագրել են ոչ բոլոր ԶԼՄ-ները, այդ թվում Նիկոլ Փաշինյանի լրատվամիջոցը չի ստորագրել, իսկ լրագրողի մասնագիտական ստաժի դրույթն ամրագրելն անտեղի է, քանի որ խմբագիրները որպես կանոն փորձառու լրագրողներին են ուղարկում խորհրդարան, դա նաեւ իրենց շահերից է բխում:
Կարդացեք նաև
Սաթիկ Սեյրանյանն էլ առաջարկեց հանդիպում կազմակերպել իրավապաշտպանների, Մարդու իրավունքների պաշտպան Արման Թաթոյանի հետ ու հույս չունենալ, որ իշխանությունները ինքնակամ կփոխեն որոշումը. «Թքած ունեն, այսպես ասած, բոլոր բանտիկների վրա»:
Լրագրողների կողմից եղավ առաջարկ նաեւ զուգահեռ բողոքի ցույցեր կազմակերպել:
Հռիփսիմե ՋԵԲԵՋՅԱՆ
