Վերաքննիչ քրեական դատարանում այսօր քննվում էր դատախազության բողոքն` ընդդեմ ՀՀ 2-րդ նախագահ Ռոբերտ Քոչարյանի եւ մյուսների գործի կարճման։
Գլխավոր դատախազի տեղակալ Գեւորգ Բաղդասարյանը ներկայացրեց դատախազության բողոքը եւ Վերաքննիչ դատարանին միջնորդեց բեկանել առաջին ատյանի դատարանի` ՀՀ երկրորդ նախագահ Ռոբերտ Քոչարյանին, 2008-ին Զինված ուժերի գլխավոր շտաբի պետ Սեյրան Օհանյանին, 2008-ին ՀՀ պաշտպանության նախարարի տեղակալ Յուրի Խաչատուրովին եւ 2008-ին Հայաստանի նախագահի աշխատակազմի ղեկավար, Անվտանգության խորհրդի քարտուղար Արմեն Գեւորգյանին արդարացնելու որոշումը եւ քրեական գործն ուղարկել դատարան` նոր քննության:
Դատախազի՝ բողոքը ներկայացնելուց հետո, բողոք ներկայացրեց նաեւ պաշտպանական կողմը։ ՀՀ 2-րդ նախագահ Ռոբերտ Քոչարյանի պաշտպան Հովհաննես Խուդոյանը միջնորդեց վերացնել նախագահի նկատմամբ ընտրված խափանման միջոց գրավը կամ նվազեցնել դրա չափը։
2020 թվականի հունիսին դատավոր Արսեն Նիկողոսյանի որոշմամբ Ռոբերտ Քոչարյանն ազատ էր արձակվել 2 մլրդ դրամ գրավի դիմաց։ Խուդոյանը նշեց, որ 300.1 հոդվածի հատկանիշներով քրեական հետապնդումը դադարեցվել է, եւ Երեւանի ընդհանուր իրավասության դատարանի որոշմամբ նշված խափանման միջոցը որոշելու պատճառների մեծ մասը վերացել է: Խուդոյանը նշեց՝ վարույթին խոչընդոտելու ռիսկն, ըստ դատարանի որոշման, չի նվազել եւ շարունակում է առկա լինել։
Կարդացեք նաև
Մինչ այս, պաշտպաններից Հայկ Ալումյանը (լուսանկարում) հետաքրքրվեց՝ եթե դատախազությունը միջնորդում է գործն ուղարկել նոր քննության՝ առաջին ատյանի դատարան, ենթադրվում է, որ գործը պետք է գտնվի Վերաքննիչ դատարանում, բայց նախորդ դատական նիստում առաջին ատյանում պարզեցինք, որ գործը դեռ գտնվում է առաջին ատյանի դատարանում․«Որտե՞ղ է գտնվում է գործը, արդյոք այն Վերաքննիչ դատարանում է։ Մի գործը չի կարող միաժամանակ երկու դատարաններում գտնվել։
Նախագահող դատավոր Նարինե Հովակիմյանը հայտնեց՝ գործը գտնվում է առաջին ատյանի դատարանում, Վերաքննիչ դատարանին են ուղարկել բողոքների հետ հավելված, գործի այն նյութերը, որոնք վերաբերելի են այս բողոքին։
Դատախազ Գեւորգ Բաղդասարյանն էլ պարզաբանեց՝ գործով բողոքը քննվում է Վերաքննիչ դատարանում։
Իսկ դատախազ Պետրոս Պետրոսյանը հավելեց՝ առաջին ատյանի դատարանը որոշում է կայացրել մեղադրանքի մի մասով, գրել է, թե որ մասով է քրեական գործը կարճել եւ այդ մասով գործը գտնվում Վերաքննիչ դատարանում։ Ըստ Պետրոսյանի՝ այս տեխնիկական հարցերը Վերաքննիչ դատարանում քննելու հարց չէ։
Կողմերի բողոքները լսելուց դատարանը որոշեց բողոքների քննությունը շարունակել սեպտեմբերի 15-ին, ժամը 10։30-ին։
Նելլի ԲԱԲԱՅԱՆ
