Վերաքննիչ քրեական դատարանում այսօր քննվում էր դատախազության բողոքն՝ ընդդեմ ՀՀ 2-րդ նախագահ Ռոբերտ Քոչարյանի եւ մյուսների գործի կարճման։
Գլխավոր դատախազի տեղակալ Գեւորգ Բաղդասարյանը (լուսանկարում) ներկայացրեց դատախազության բողոքը եւ Վերաքննիչ դատարանին միջնորդեց բեկանել առաջին ատյանի դատարանի` ՀՀ երկրորդ նախագահ Ռոբերտ Քոչարյանին, 2008-ին Զինված ուժերի գլխավոր շտաբի պետ Սեյրան Օհանյանին, 2008-ին ՀՀ պաշտպանության նախարարի տեղակալ Յուրի Խաչատուրովին եւ 2008-ին Հայաստանի նախագահի աշխատակազմի ղեկավար, Անվտանգության խորհրդի քարտուղար Արմեն Գեւորգյանին արդարացնելու որոշումը եւ քրեական գործն ուղարկել դատարան` նոր քննության:
Բաղդասարյանի ներկայացմամբ՝ Սահմանադրական դատարանի որոշումից հետո ի հայտ է եկել ամբաստանյալներին առաջադրված մեղադրանքները վերաորակելու խնդիր, որովհետեւ նրանց արարքները համապատասխանում են Քրեական օրենսգրքի 309 հոդվածի 3-րդ մասով նախատեսված հանցագործությանը․«Այդ խնդիրն առաջացել է բացառապես Սահմանադրական դատարանի որոշումից հետո, որովհետեւ որքան էլ շահարկված լինի դատավարական եւ արտադատավարական մակարդակներում, արարքի որակումը կանխատեսումներով չէ, այդ թվում՝ Սահմանադրական դատարանի որոշմամբ պայմանավորված, արարքի որակումներն ունեն կանոններ՝ եթե առկա է հատուկ նորմ, արարքը պետք է որակվի հատուկ նորմով։ Ընդհանուր նորմով վերաորակելու անհրաժեշտություն եւ պարտադիր պահանջ առաջանում է այն դեպքում, երբ հատուկ նորմ այլեւս չկա»։
Դատախազի խոսքով՝ անհրաժեշտություն կա հակափաստարկելու նրանց, ովքեր կարծում են, որ այդ վերաորակումն ավելի շուտ կարող էր լինել, եւ պարտականություն՝ հատուկ հակափաստարկներ նրանց, ովքեր կարծում են, որ առկա որակման պայմաններում ՍԴ որոշումից հետո արարքի վերաորակում տեղի ունենալ չէր կարող։
Կարդացեք նաև
ՍԴ որոշմամբ նորմը, որով նախատեսված հանցագործությունը մեղսագրվում էր ամբաստանյալներին, դադարեց գոյություն ունենալ, բայց չդադարեց գոյություն ունենալ այդ արարքը, որը կատարվել է, որը նկարագրված է իրենց մեղադրանքներում: Այդ արարքները այդ նկարագրությամբ կարող են որակվել Քրեական օրենսգրքի 309 հոդվածի 3-րդ մասով։
Դատախազության բողոքի ներկայացման ժամանակ տուժողների իրավահաջորդի ներկայացուցիչ, փաստաբան Սեդա Սաֆարյանը լքեց դատարանի նիստերի դահլիճը՝ զբաղվածության պատճառաբանությամբ։
Բողոք ներկայացրեց նաեւ պաշտպանական կողմը։
Նելլի ԲԱԲԱՅԱՆ
