Այսօր կառավարությունում լրագրողների հետ ճեպազրույցի ժամանակ արդարադատության նախարար Կարեն Անդրեասյանը լրագրողի այն հարցին, թե ադրբեջանական զինված ուժերի կողմից Կապան-Գորիս ավտոճանապարհի փակած հատվածները Հայաստանի տարա՞ծքն է, թե՞ ինչպես պնդում են ադրբեջանցիները՝ ադրբեջանական է, ի պատասխան ասաց, որ իրավաբանական արձագանք չի կարող տալ. «Հարցի հասցեատերը ԱԳՆ-ն ու ռազմական գերատեսչություններն են։ Բայց վարչապետը բազմիցս նշել է դեմարկացիայի ու դելիմիտացիայի անհրաժեշտության մասին։ Առանց սահմանազատման խնդիրների լուծման, իրավաբանական արձագանք ձեր հարցին տալ այսօր տեղին չի լինի եւ ես չեմ կարող արձագանքել»:
Այն դիտարկմանը՝ թե այդ տարածքներում ապրող բնակիչների իրավունքները, ազատ տեղաշարժը սահմանափակվել են, Կարեն Անդրեասյանն ասաց, որ Ադրբեջանի քաղաքականության պատճառով մարդու իրավունքների բազմաթիվ խախտումներ են լինում, ինչի մասին բարձրաձայնել է կառավարությունը. «Ցավում եմ, որ գործընթացները չեն գալիս այն հանգրվանին, որ մեր հարեւան պետության հետ այնպիսի իրավական գործընթացներ տեղի ունենան, որ այլեւս հարեւան պետության պատճառով մեր քաղաքացիների իրավունքները չխախտվեն»:
Լուսինե ԲՈՒԴԱՂՅԱՆ
