«Հայաստան» խմբակցության ղեկավար Սեյրան Օհանյանն այսօր խորհրդարանում կառավարության հնգամյա ծրագրի քննարկման ժամանակ անդրադարձավ երկրի անվտանգության հարցերին, բայց մինչ բուն ելույթին անցնելը, նա ներողություն խնդրեց անցած երկու օրերի ընթացքում ԱԺ-ում տեղի ունեցած միջադեպերի համար։
Սեյրան Օհանյանի խոսքով՝ կառավարության ծրագրում չկա ռազմաքաղաքական իրավիճակի հստակ գնահատական՝ անվտանգության միջավայրի փխրունությունը եւ սպառնալիքների ուժգնացող վիճակը գնահատելու։
Պարոն Օհանյանն ասաց, որ տարածաշրջանային դերակատարների, հատկապես Թուրքիայի՝ Հարավային Կովկաս մտնելը չի ստիպել պաշտպանական ռազմավարական վերանայում կատարել եւ ունենալ զինված ուժերի զարգացման կամ բարեփոխումների պլան․ «Ծրագիրը չի համապատասխանում Հայաստանի ու Արցախի առաջ կանգնած եւ ահագնացող անորոշություններին։ Մենք, իհարկե, մերժում ենք պարտվողի հոգեբանությունը, Ադրբեջանի հետ ժամանակավրեպ եւ առանց հիմքերի խաղաղության խաբկանքի մեջ մտնելը։ Իհարկե, կողմ ենք տարանցիկ դերակատարության հետ, այն առաջին անգամ այստեղ չէ, որ հնչում է, բայց՝ միայն ու միայն մեր ազգային ու պետական շահից բխած խելամիտ լուծումներով»։
Նրա ներկայացմամբ․«Այս պահին ճանապարհների ապաշրջափակումը Հայաստանի եւ Արցախի համար բերելու է խորը շրջափակման, ինչպես մենք տեսնում ենք ժամանակավրեպ կերպով ռազմավարական կետերը՝ ճանապարհները, Ադրբեջանին հանձնելն ինչպիսի իրավիճակ է բերում այսօր նույն Կապանում»։
Կարդացեք նաև
Նելլի ԲԱԲԱՅԱՆ
