«Խստորեն դատապարտում եմ այն բռնությունը, որը տեղի ունեցավ ԱԺ նիստերի դահլիճում: Բռնությունն արդարացում չունի, անընդունելի է, ԱԺ-ն այդ տեղը չէ, որտեղ որ բռնություն պետք է կիրառվի: Շատ տարբեր իրավիճակներ, որոնց ականատես ենք դարձել, քննարկման առարկա են եւ գտնելու ենք լուծումեր`այդ իրավիճակներից խուսափելու համար»,- խորհրդարանում, լրագրողների հետ զրույցում ասաց ԱԺ նախագահ Ալեն Սիմոնյանն`անդրադառնալով երեկվանից խորհրդարանի նիստերի դահլիճում տեղի ունեցող միջադեպերին:
Ալեն Սիմոնյանը, մասնավորապես, անընդունելի է համարում, երբ լրագրողներին օթյակից հանում են . «Ես քննարկել եմ գործընկերներիս հետ եւ ամենայն հավանականությամբ նման իրավիճակի դեպքում, մենք որեւէ ձեւով լրագրողներին չպետք է այնտեղից հանենք, չնայած կա մտավախություն, որ դա կարող է անվտանգությանը սպառնալ, բացի այդ կա կարծիք, որ ճիշտ չէ, երբ մարդուն հարվածելու լուսանկարը կամ տեսանյութը, որտեղ ինքը գետնին է ընկնում, հրապարակվում է, որպեսզի նրանց արժանապատվության եւ բարի համբավն որեւէ մեկը չկարողանա վնաս հասցնել»:
Լրագրողների դիտարկմանը` կարծում են, որ լրագրողներին օթյակից բռնի դուրս հանելը ԱԺ նախագահության հրահանգով է եղել, Ալեն Սիմոնյանը չհամաձայնեց: Նա նաեւ ասաց, որ լրագրողները ԱԺ նիստերի դահլիճ մտնելու իրավունք չունեն, բայց նման դեպքեր եղել են։
Լրագրողներից մեկը հիշեցրեց՝ տարիներ առաջ եղած մի միջադեպի ժամանակ, լրագրողները ներս են մտել ԱԺ նիստերի դահլիճ, եւ «Ելք» խմբակցությունը, որը պայքարում էր իշխանության համար, դեմ չէր եղել դրան, եւ ավելին այդ խմբակցության պատգամավորները դահլիճում հարցազրույցներ էին տվել, իսկ այսօր իշխող ուժի որոշ պատգամավորներ արդեն հրում են լրագրողներին։ Ալեն Սիմոնյանը հակադարձեց, որ չի ցանկանում ճեպազրույցը լրագրողի հետ մենախոսության վերածել եւ չհամաձայնեց, որ իրենք այժմ երկակի ստանդարտներով են առաջնորդվում` հավելելով, որ եթե ժամանակին «Ելքի» պատգամավորները հարցազրույց են տվել նիստերի դահլիճում, դա չի նշանակում, որ այն ժամանակվա ԱԺ ղեկավարությունը թույլ է տվել լրագրողներին ԱԺ դահլիճ մտնել, քանզի ամեն ինչ կարգավորվում է օրենքով:
Ալեն Սիմոնյանը չպատասխանեց հարցին`ի՞նչ որակում կտա այն իշխանությանը, որի իշխանության շրջանում «հայրենիքի դավաճանները», որոնց պաշտոնավարման շրջանում մարդիկ ազատվել են բանակից, ազատության մեջ են. «Ես եկել եմ այստեղ խոսելու այն մասին, թե ինչ տեղի ունեցավ այսօր։ Ես հիմա որակումներ տալու հարցում սահմանափակված եմ»:
Կարդացեք նաև
Նելլի ԳՐԻԳՈՐՅԱՆ
