80 տարեկանում վախճանվել է բրիտանական լեգենդար Rolling Stones խմբի թմբկահար Չարլի Ուոթսը, հաղորդում է BBC-ն:
Նշվում է, որ Ուոթսը խաղաղ մահացել է Լոնդոնի հիվանդանոցներից մեկում՝ շրջապատված ընտանիքի անդամներով:
Ուոթսի մահվան մասին հայտարարության մեջ նշվում է, որ նա եղել է «սիրված ամուսին, հայր, պապ և իր սերնդի ամենահզոր թմբկահարներից մեկը»: Նաև ասվում է, որ անհրաժեշտ է հարգանքով վերաբերվել նրա ընտանիքին, ընկերներին և խմբի անդամներին այդ ծանր պահին:
Մի քանի շաբաթ առաջ հաղորդվում էր, որ Ուոթսը բաց կթողնի խմբի հյուրախաղերը, քանի որ վերականգնվում է բուժումից հետո: Թեև չէր նշվում, թե ինչ հիվանդության մասին է խոսքը, բայց հայտնի է, որ 2004թ. նա բուժվում էր կոկորդի քաղցկեղից:
Չարլի Ուոթսը Rolling Stones-ին միացել է 1963թ.: Նա ոչ միայն խմբի թմբկահարն էր, այլև հեղինակել է մի քանի ալբոմների շապիկներ: 2016թ. Rolling Stones ամսագիրը բոլոր ժամանակների 100 ամենամեծ թմբկահարների շարքում նրան դասել էր 12-րդ տեղում: Classic Rock պարբերականի նույն վարկանիշային ցանկում նա 10-րդն է:
Պատրաստեց՝ Վիկտորյա ԱՆԴՐԵԱՍՅԱՆԸ
