Ադրբեջանի նախագահ Իլհամ Ալիևը Բաքվում ընդունել է ՄԱԿ-ի նորանշանակ ռեզիդենտ-համակարգող Վլադանկա Անդրեևային: Հանդիպման ընթացքում Ալիևը բողոքել է, թե Հայաստանն է խոչընդոտներ ստեղծում ՅՈՒՆԵՍԿՕ-ի տարածաշրջան կատարվելիք այցին:
Ալիևի հայտարարել է, թե մի քանի տարի առաջ Ադրբեջանը ՅՈՒՆԵՍԿՕ-ին հրավիրել էր գալ և տեսնել, «թե ինչ է կատարվում օկուպացված տարածքներում»: «ՅՈՒՆԵՍԿՕ-ի ներկայացուցիչներն ասացին, թե չեն խառնվում քաղաքական գործերին: Մինչդեռ պատերազմից հետո մենք ՅՈՒՆԵՍԿՕ-ից ազդակներ ստացանք, որ ցանկանում են գալ»,- ասել է Ալիևը:
Նրա խոսքով՝ Ադրբեջանը համաձայնություն է տվել ՅՈՒՆԵՍԿՕ-ի առաքելության ժամանմանը: Ըստ նրա՝ «առաքելությունն արդեն ձևավորված է, սակայն հիմա էլ Հայաստանն է խոչընդոտներ ստեղծում»: «Դրա համար էլ առաքելության այցը դեռ հետաձգվում է»,- ասել է Ալիևը:
Ալիևը նաև նշել է, որ իրենք կապ են պահպանում ՄԱԿ-ի՝ Փախստականների հարցերով գերագույն հանձնակատարի հետ, և ցանկանում են հնարավորինս արագ «հարկադիր տեղահանվածներին վերադարձնել ազատագրված տարածքներ»:
Կարդացեք նաև
Իր հերթին Անդրեևան հույս է հայտնել, որբ նոյեմբերի 10-ի եռակողմ հայտարարությունը խթան կհանդիսանա տարածաշրջանում ամուր կայունության համար: Նա նշել է, որ դեկտեմբերին իրենք ընդառաջել են Բաքվի խնդրանքին և 1 միլիոն դոլար հավաքել 6 շրջանների ականազերծման համար: Անդրեևան նաև ընդգծել է, որ ՄԱԿ-ում կցանկանային աջակցել Ադրբեջանի կառավարության նախագծերը՝ ուղղված ավելի կանաչ տնտեսության կառուցմանը, առողջապահության, սոցիալական պաշտպանության, կրթության և արդարադատության ներուժի ամրապնդմանը:
Պատրաստեց՝ Վիկտորյա ԱՆԴՐԵԱՍՅԱՆԸ
