«Իրավիճակի ամբողջ պատասխանատվությունը կրում է իշխանությունը»,- խորհրդարանում լրագրողների հետ զրույցում ասաց «Պատիվ ունեմ» խմբակցության ղեկավար Արթուր Վանեցյանն`անդրադառնալով այսօր խորհրդարանում տեղի ունեցածին, ինչի արդյունքում ընդդիմադիր պատգամավոր Արծվիկ Մինասյանը վնասվածքներ է ստացել։
«Նիկոլ Փաշինյանն իր ուղիղ հրահանգով հրահրեց այս բռնությունը։ Երբ Տիգրան Աբրահամյանը հարց հնչեցրեց ու ասաց, որ նման վարքագիծն անթույլատրելի է Աննա Մկրտչյանի նկատմամբ, Նիկոլ Փաշինյանն ասաց՝ ես կարծում եմ, որ դեռ շատ մեղմ են արձագանքել եւ պետք էր ավելի կոպիտ արձագանք։ Մեկ հրահանգով հարձակում սկսվեց երիտասարդ պատգամավորի նկատմամբ, որը սխալ բան չէր ասել։ Հիմա կփորձեն շուռ տալ ու ասել, որ Աննա Մկրտչյանը վիրավորել է իրենց ղեկավարին»,- ասաց Արթուր Վանեցյանը։
Արթուր Վանեցյանը չհամաձայնեց լրագրողների այն դիտարկմանը, որ «Պատիվ ունեմ» խմբակցությունում միայն Աննա Մկրտչյանն է ակտիվ։
«Յուրաքանչյուրը խոսում է իր ոլորտով, բայց ամենակարեւորն այն է, որ մեր դիրքորոշումներում որեւէ բան չի փոխվել։ Այս իշխանությունները հասցրել են պարտության, տապալել են մեր երկրի անվտանգային համակարգը, այս իշխանությունները կոտրել են մեր ազգի հաղթանակած ոգին եւ այս իշխանությունները ուշ-թե ուշ պատասխան են տալու այդ ամենի համար»,- ասաց Արթուր Վանեցյանը:
Կարդացեք նաև
Խորհրդարանում ծեծկռտուքի առիթով ընդդիմադիրներն հանցագործության մասին հաղորդում են ներկայացրել ոստիկանություն։
Այլ մանրամասները`տեսանյութում
Նելլի ԳՐԻԳՈՐՅԱՆ
