Նախորդ կառավարության՝ 2019 թվականի ծրագրում նշված էր, որ կառավարության առաջնահերթություններից մեկը Հայաստանում եւ Արցախում ներդրումների ներգրավումն է լինելու, այս ծրագրում ներդրումների ներգրավման որեւէ դրույթ չկա: Այսօր Ազգային ժողովում կառավարության հարցուպատասխանի ժամանակ ՀՀ վարչապետ Նիկոլ Փաշինյանին այսպիսի հարց ուղղեց «Հայաստան դաշինքի» պատգամավոր Արթուր Խաչատրյանը:
«Մենք կառավարության ծրագիրը ձեւակերպել ենք այնպես, որպեսզի այն առավելագույնս համապատասխանի բանակցային գործընթացի համար պատշաճ միջավայր ձեւավորելուն»,-ի պատասխան ասաց Նիկոլ Փաշինյանը:
Նա ասաց. «Ես ուզում եմ հիշեցնել, որ հուլիսի 29-ին ԵԱՀԿ Մինսկի խմբի համանախագահները հանդես են եկել հայտարարությամբ՝ կողմերին կոչեր անելով՝ այդ թվում ստեղծել պատշաճ միջավայր բանակցությունների գործընթացի համար: Հայաստանի արտաքին գործերի նախարարությունը ողջունել է ԵԱՀԿ Մինսկի խմբի համանախագահության այդ հայտարարությունը, եւ մենք չենք կարող անհաղորդ մնալ ԵԱՀԿ Մինսկի խմբի համանախագահների հայտարարությանը: Այն ինչ-որ գրված է նախընտրական ծրագրում՝ գրված է նախընտրական ծրագրում, այն ինչ որ գրված է կառավարության ծրագրում՝ արվել է առավելագույնը բանակցային գործընթացի համար նպաստավոր ձեւակերպելու համար»:
Արթուր Խաչատրյանն արձագանքելով՝ ասաց՝ շատ շնորհակալություն, որ նշեցիք՝ նախընտրական ծրագրում կարելի է մի բան գրել, հետո դա չիրականացնել:
Կարդացեք նաև
Լուսինե ԲՈՒԴԱՂՅԱՆ
