«Այն վարքագիծը, որը դրսեւորվեց ԱԺ նիստերի դահլիճում Արծվիկ Մինասյանի նկատմամբ, ընդմիջման պայմաններում, ակնհայտ քրեորեն հետապնդելի արարք է: Երբ մենք խոսում էինք բռնապետության մասին՝ շատերը դա համարում էին խիստ եւ քննադատելի»,- խորհրդարանում, լրագրողների հետ զրույցում ասաց «Հայաստան» դաշինքի պատգամավոր Արամ Վարդեւանյանն`անդրադառնալով խորհրդարանում տեղի ունեցած քաշքշուքին, որին մասնակցում էին նաեւ անվտանգության աշխատակիցները:
Արամ Վարդեւանյանը նկատում է, որ որեւէ բռնապետի ժամանակահատվածում անգամ խորհրդարանի դահլիճում նման վարքագիծ չի դրսեւորվել:
Թե որքանո՞վ է խորհրդարանի դահլիճում տեղի ունեցածը տեսաձայնագրվել՝ Արամ Վարդեւանյանը չգիտե, քանի որ նաեւ լրագրողներին չթույլատրվեց տեսանկարահանել ԱԺ դահլիճում կատարվողը, բայց որ այդ ամենը դառնալու է մի մեծ քրեական գործ, վստահ է:
Կարդացեք նաև
«Իրականում, գարշանք էր առաջացնում, որ տղամարդը կարող է նման վարքագիծ դրսեւորել կնոջ, առավել եւս՝ երիտասարդ աղջկա նկատմամբ»,- հավելեց Արամ Վարդեւանյանն`անդրադառնալով այն դրվագին, երբ անվտանգության աշխատակիցները ընդդիմադիր պատգամավոր Աննա Մկրտչյանի նկատմամբ բռնի ուժ կիրառելով փորձում էին նրան հեռացնել նիստերի դահլիճից:
Տեղի ունեցածը Արամ Վարդեւանյանը խորհրդարանական կառավարման համակարգ ընտրած Հայաստանի համար համարում է խայտառակ էջ: Տեղի ունեցածի առիթով հաղորդում է ներկայացվելու: «Այն անձինք, ովքեր հարվածներ են հասցրել Արծվիկ Մինասյանին, ենթարկվելու են քրեական պատասխանատվության: Եթե դուք տեսնեք այն մարմնական վնասվածքը, որը Արծվիկ Մինասյանը ստացել է, դա հրմշտոց չէ, խուլիգանական վարքագիծ է, իսկ խուլիգանական վարքագիծ դրսեւորողները պատժվելու են օրենքի ողջ խստությամբ»,- ասաց Արամ Վարդեւանյանը` հավելելով, որ ճիշտ կլինի, եթե Արծվիկ Մինասյանը դատափորձաքննության անցնի:
Արամ Վարդեւանյանի գնահատմամբ՝ գործող իշխանության վախերը պայմանավորված են նրանով, որ ընտրությունների արդյունքները չեն արտահայտել գործընթացի իրական պատկերը:
Այլ մանրամասները`տեսանյութում.
Նելլի ԳՐԻԳՈՐՅԱՆ
