Հայաստանն աստիճանաբար անցում կկատարի պրոֆեսիոնալ բանակի, էականորեն կփոխվի ժամկետային եւ զորահավաքային զինծառայության կառուցվածքը։ Այս մասին այսօր խորհրդարանում, ներկայացնելով կառավարության 2021-2026 թվականների գործունեության ծրագիրը, ասաց վարչապետ Նիկոլ Փաշինյանը։
Նրա խոսքով՝ կառավարությունը կարեւոր է համարում մեր բանակի տեխնոլոգիական արդիականացումը, ավտոմատացված կառավարման համակարգի ներրդրումը, զինվորական ծառայության գրավչության բարձրացումը, աշխատավարձային եւ սոցիալական երաշխիքների նոր քաղաքականության միջոցով ռազմական կրթության որակի էական բարձրացումը, ինչպես նաեւ՝ կանանց առավել լայնածավալ ներգրավումը ԶՈՒ մարտական ստորաբաժանումներում։
«Կանանց ներգրավվածության մասին թեզը չունի որեւէ գաղափարախոսական կամ հակագաղափարախոսական հենք, այլ պայմանավորված է բացառապես պրագմատիկ հաշվարկով։ Կանայք ՀՀ բնակչության մեծամասնությունն են, եւ նրանց ռեսուրսի ներգրավվածությունը որեւէ ոլորտում՝ պաշտպանությունից մինչեւ տնտեսություն, նշանակում է մեր երկրի զարգացման պոտենցիալի աղճատում։ Ասածը չի նշանակում, որ կանայք բանակում պետք է նույնքան ներգրավված լինեն, որքան տղամարդիկ։ Խոսքը պոտենցիալի հնարավորինս լիարժեք օգտագործման մասին է, եւ այս պոտենցիալը դեռ պետք է բացահայտվի»,-ասաց Փաշինյանը։
Նրա խոսքով՝ բանակի բարեփոխումների եւ արդիականացման գործում իշխանությունը կարեւորում է ՀՀ ռազմավարական դաշնակցի՝ ՌԴ-ի հետ համագործակցությունը եւ, ինչպես Փաշինյանն ասաց, այս առումով ՌԴ-ի հետ արդեն իսկ կան կոնկրետ պայմանավորվածություններ։
Կարդացեք նաև
Նելլի ԲԱԲԱՅԱՆ
