Հայաստանում առաջին անգամ մեկնարկում է ժամանակակից պարի միջազգային SUMMEET փառատոնը, որն իրականացվում է Սանկտ Պետերբուրգի «Kannon Dance» պարային տան, Երևանի Կոմիտասի անվան պետական կոնսերվատորիայի Օպերային ստուդիայի և «Balmanukyan Dance Project» ընկերության հետ համատեղ, իսկ փառատոնի հիմնական հարթակը կոնսերվատորիայի Օպերային ստուդիայի դահլիճն է։
Ինչպես Երևանի պետական կոնսերվատորիայի Օպերային ստուդիայի ճեմասրահում այդ թեմայով կայացած ասուլիսի ժամանակ նշեց փառատոնի պրոդյուսեր Էռնա Ռևազովան, նման փառատոն ունենալու գաղափարն ասպասելի է ծագել, եւ այժմ շատ ուրախ են, որ ԿԳՄՍ նախարարությունն իրենց նախագիծը հետաքրքիր է համարել ու հնարավորություն ընձեռել իրականացնելու համար, հատկապես որ այս բարդ ժամանակներում փառատոն իրականացնելն այնքան էլ հեշտ չէ:
Նա հատկապես առանձնացրեց օգոստոսի 24-ին ցուցադրվելիք Վալերիա Կասպարովայի բեմադրած «Սեւ այգի» ներկայացումը; Այն յուրահատուկ է նրանով, որ փաստագրական բեմականացում է` ստեղծված Արցախյան առաջին պատերազմի ականատես երեխաների հուշերի հիման վրա: «Պատերազմն ազգություն չունի, պատերազմն ինքնին սարսափելի բան է»,-ասաց Ռեւազովան:
Փառատոնի միջազգային պրոդյուսեր Վադիմ Կասպարովը նշեց, որ նման փառատոն առաջին անգամ է անցկացվում Հայաստանում, եւ երբեք չի եղել, որ տեղական խորեոգրաֆիական ուժերն այսպես ի մի բերվեն: «Այս փառատոնը կարող է դառնալ Հայաստանի այցեքարտը»,-համոզմունք հայտնեց նա:
Կարդացեք նաև
Ի թիվս այլնի՝ Վադիմ Կասպարովը հավելեց, որ ժամանակակից պարին նվիրված փառատոնը կփակվի «Բոլոր ճանապարհները տանում են հյուսիս» ներկայացումով, որը Ռուսաստանի ազգային թատերական «Ոսկե դիմակ»- 2017 մրցանակաբաշխության դափնեկիր է՝ «Ժամանակակից պար/Լավագույն ներկայացում» անվանակարգում:
Օպերային ստուդիայի գեղարվեստական ղեկավար, օպերային ճանաչված երգչուհի Հասմիկ Պապյանը նույնպես ներկա էր փառատոնի բացման ասուլիսին, եւ պատահական չեն փառատոնի մասին գրքույկում նրա հետեւյալ տողերը. «Մենք փոքր ենք դահլիճով եւ բեմով, բայց մեծ` մեր առջեւ դրված հավակնոտ նախագծերով եւ ծրագրերով»:
Հավելենք, որ «SUMMEET» փառատոնի շրջանակում Հայաստանում առաջին անգամ կցուցադրվի նաեւ «Dancewalk» պարային նախագիծ պերֆորմանսը, որը ստեղծել է շվեյցարացի հայտնի պարուսույց Ֆուֆուա դ՛Իմոբիլիտեն։
Գոհար ՀԱԿՈԲՅԱՆ
