Մշակույթի ոլորտում քիչ են հանդիպում անհատներ, որոնք լուռ, առանց աղաղակելու զբաղված են իրենց գործով։ Երաժիշտ Էդգար Հայրապետյանը նրանցից մեկն է, ում տարիների կատարած պրոֆեսիոնալ աշխատանքը ևս նկատվել է ՀՀ կառավարական մակարդակով։
Հայաստանի Հանրապետության մշակութային կյանքում և արվեստի բնագավառում ակտիվ գործունեություն ծավալելու և ոլորտում ներդրած մեծ ավանդի համար, օրերս ստեղնաշարային գործիքների անզուգական վարպետ Էդգար Հայրապետյանը արժանացել է ՀՀ կառավարության պատվոգրի։
Հայկական երաժշտարվեստում Էդգար Հայրապետյան անուն ազգանունը անկախ վայրից, երկրից, ազգությունից ու արտիստի քմահաճ պահանջներից, իր գործն անում է անթերի ու դառնում տվյալ արտիստի հաջողության գրավականը։
Հայկական Էստրադայում անփոխարինելի երաժիշտ Էդգար Հայրապետյանը անվանի շատ արտիստների հետ համագործակցություններով նվաճել է աշխարհի մեծ բեմերը՝ Ռուսաստանի Դաշնության տասնյակ քաղաքներում, Եվրոպայում, Կանադայում, ԱՄՆ-ում, որտեղ թևածել է հայ երգն ու երաժշտությունը։
Անհերքելի փաստ է, որ հայաստանյան հայտնի աստղերն իրենց համերգներն ու մենահամերգները, ինչպես նաև Հայաստանից մինչև աշխարհի տարբեր ծայրերում կայացած հյուրախաղերը վստահել ու վստահում են Էդգարին։ Այդ թվում՝ ՀՀ վաստակավոր արտիստներ Նունե Եսայանը, Հարութ Փամբուկչյանը՝ Ձախ Հարութ, Արման Հովհաննիսյանը, Սիրուշոն, Արամեն, Արմենչիկը, Ռազմիկ Ամյանը և այլ սփյուռքաբնակ ու հայաստանաբնակ անվանի արտիստներ։
Նրա նվագակցությամբ կայացել են ոչ միայն համերգներ ու մենահամերգներ, կամ ստեղծվել հանրության կողմից հայտնի բազմաթիվ երգեր ու երաժշտություններ, այլ նաև մի շարք երաժշտական հեռուստանախագծեր։
Էդգարն իր տարիների ձեռք բերած երաժշտական ահռելի փորձի ու գիտելիքների մեծ պաշարի շնորհիվ հաճախ է լինում երաժշտական մրցույթների, փառատոների ժյուրիի կազմում, այդ թվում նաև իր վճռորոշ կարծիքն է արտահայտում հայաստանյան մի շարք երաժշտական քոլեջների ընդունելության քննություններում, որպես հանձնաժողովի անդամ։ Դրա վառ օրինակը վերջերս Երևանի մշակույթի և արվեստի պետական և Ռոմանոս Մելիքյանի անվան պետական երաժշտական քոլեջներում տեղի ունեցած ընդունելության պետական քննություններն էին, որտեղ ՀՀ ժողովրդական արտիստ Երվանդ Երզնկյանի, ջազմեն Մադաթ Ռոմանիչի և երաժշտարվեստում հայտնի անունների հետ Էդգարն իր որոշիչ դերն ունեցավ գործիքային արվեստի ապագա երաժիշտների ճանապարհ հարթելու հարցում։
Աշխատասեր, տաղանդավոր ու ստեղծագործող երաժիշտ Էդգար Հայրապետյանն իր կյանքն առանց երաժշտության անիմաստ է համարում։ Նա հայ երաժշտական աշխարհի կարևոր ներկայացուցիչ է՝ հուսալի գործընկեր, պահանջված դաշնակահար, գործիքավորող, որի հետ համագործակցության համար, գերծանրաբեռնված գրաֆիկի պատճառով, անգամ հետաձգվում են համերգներ ու մենահամերգներ։
Կարինե Բաղդասարյան
