«Գլխավոր դատախազի`ԱԺ գալու հրամայական շարունակում է մնալ, խնդիր ունենք պատգամավորի անձեռնմխելիության դրույթը չզրոյացնելու»,- այսօր, խորհրդարանում կայացած հանդիպման ժամանակ հայտարարեց ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Թագուհի Թովմասյանն`անդրադառնալով «Հայաստան» խմբակցության պատգամավոր Արմեն Չարչյանին կալանավորելու դատարանի որոշմանը:
Այսօր ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Թագուհի Թովմասյանը քննարկման էր հրավիրել ՀՀ մարդու իրավունքների ներկա եւ նախկին պաշտպաններին, ԱԺ համանուն հանձնաժողովի նախկին նախագահներին`միասին քննարկելու ոլորտային առաջնահերթությունները:Քննարկմանը ներկա էին ՀՀ մարդու իրավունքների առաջին պաշտպան Լարիսա Ալավերդյանը, ԱԺ նախկին պատգամավոր, համանուն հանձնաժողովի նախագահ Արամ Սաֆարյանը եւ Անի Սամսոնյանը:
«Մենք չենք եկել զրոյից սկսելու, այլ շարունակելու ենք մյուսների աշխատանքը»,- ասաց նա: Առանց պատգամավորի անձեռնմխելիությունը հաղթահարելու`Արմեն Չարչյանին կալանավորելու դատարանի որոշումն, ըստ Թագուհի Թովմասյանի, վեր է ամեն ինչից. «Այս դատապարտելի գործելաոճը պետք է խորհրդարանը քննարկման առարկա դարձնի»: Նա հիշեցրեց, որ նույն իրավիճակում են նաեւ «Հայաստան» խմբակցության պատգամավորներ Մխիթար Զաքարյանը եւ Արթուր Սարգսյանը: Նրանք կալանավորված են եւ գտնվում են մեկուսարանում. այս շաբաթ Թագուհի Թովմասյանը ծրագրում է այցելել նրանց:
Անդրադառնալով ոլորտային առանձնահատկություններին, Թագուհի Թովմասյանը խոսեց սահմանամերձ բնակավայրերի բնակիչների կյանքի իրավունքի իրացման խնդրի մասին: Ասաց նաեւ, որ խնդիր ունենք նաեւ լրագրողների`ԱԺ-ում ազատ տեղաշարժի կարգի հետ, որը չի քննարկվել շահագրգռ անձանց եւ կազմակերպությունների հետ. «Ստացվում է, իշխանությունն ինչ ցանկանում`որոշում է, մյուսներն էլ պետք է հաշտվեն այդ որոշումների հետ»:
Կարդացեք նաև
Նա անդրադարձավ նաեւ ֆիզիկայի գիտավանի հարցին, երբ քաղաքացիների, այդ թվում անչափահասների նկատմամբ բիրտ ուժ կիրառվեց. «Նոր Հայաստանում, թվում է, թե այս գործելաոճը չպետք է լիներ: Պետք է հասկանանք`ինչպե՞ս կանգնել մեր քաղաքացիների կողքին, որպեսզի նրանք լինեն պաշտպանված»:
Նելլի ԳՐԻԳՈՐՅԱՆ
