«Մեծամիտ, ամբարտավան ելույթ էր՝ բարձր տոնով։ Նա գործադիրի առաջին ներկայացուցիչն է, որ նորընտիր ԱԺ-ում ելույթ է ունենում։ Բովանդակային, թվերով հաշվարկված հարցեր հնչեցին, մինչդեռ նա ոլորտին չէր տիրապետում, պատասխաններ չտվեց»,-ԱԺ արտահերթ նիստում այսօր հայտարարեց «Հայաստան» դաշինքի պատգամավոր Արթուր Ղազինյանը։ Նրա խոսքով՝ հատկապես նման կարեւոր ոլորտները պետք է մասնագետներին վստահվեն․ «Կարեն Սարգսյանը գործադիրի իր գործընկերներին պետք է տեղեկացնի, որ ԱԺ-ում այլեւս իրավիճակ է փոխվել, եւ նման ոճով ու տոնով խոսել պատգամավորների հետ չի ստացվելու»։
Հիշեցնենք, որ այսօր «Հայաստան» դաշինքից Թադեւոս Ավետիսյանը, դիմելով ջրային կոմիտեի նախագահ Կարեն Սարգսյանին, նրան մեղադրել էր վատ կառավարման եւ իշխանությանն արդարացնելու համար ու ասել էր՝ «հիմա Հադրութն ու Շուշին հայկական չեն․ եթե մի օր Սեւանը չեղավ, ումի՞ց ենք ջուր վերցնելու»։
Կարեն Սարգսյանն էլ ընդդիմադիր պատգամավորներին վրդովված տոնով նախատել էր․ «Սաղդ դառել եք հայրենասեր, մենք էլ՝ Սեւան ծախո՞ղ»։ «Հայաստան» դաշինքից Արամ Վարդեւանյանն էլ իր հերթին նշեց․ «Ցավում եմ, որ ԱԺ ամբիոնից գործադիրի պաշտոնյան իրեն թույլ տվեց նման վարքագիծ։ Կոնկրետ մասնագիտացում պահանջող պաշտոնին նշանակված է այլ կարգավիճակ ունեցող անձ։ Ենթադրենք, որ ջրային ռեսուրսը վստահվել է մարզական լրագրողի մասնագիտացում ունեցող անձի։ Դրանից ջրային կառավարումն ի՞նչ վիճակում կլինի։ Հարցերին պատասխաններ չեն հնչում։ Չգիտես ինչու, Կարեն Սարգսյանը որոշեց նաեւ քաղաքական ելույթ ունենալ»։
Կարդացեք նաև
Հիշեցնենք, որ ԱԺ-ն այսօր արտահերթ նիստում առաջին ընթերցմամբ ընդունեց կառավարության հեղինակած՝ «Սեւանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան ու համալիր ծրագրերը հաստատելու մասին» օրենքում լրացումներ կատարելու մասին նախագիծը, որը ենթադրում է Սեւանից հավելյալ ջրառ։ Դեռեւս օգոստոսի 6-ին կառավարությունը հավանություն տվեց օրենքի նախագծին, որով ոռոգման նպատակով Սեւանա լճից 2021թ․-ի բացթողման 170 մլն մ³ չափաքանակը պետք է դարձվի մինչև 245 մլն մ³․ այդ նիստում հայտարարվել էր, որ Սեւանի ջրի մակարդակը նախորդ տարվա համեմատ 4 սանտիմետրով իջել է։
Մինչդեռ դեռեւս մայիսին վարչապետ Նիկոլ Փաշինյանը հայտարարել էր՝ շուտով սպասվում է իրենց կառավարման սենսացիոն նորություններից մեկը․ հունիս-հուլիս ամիսներին Սևանա լճի մակարդակն ամենաբարձրը կլինի վերջին 60 տարում։
Լուիզա ՍՈՒՔԻԱՍՅԱՆ
