«Բնապահպաններն ահազանգում են, որ ջրառի գերազանցումը նշանակում է խախտել Սեւանի հաշվեկշիռը։ Դուք նման հաշվարկ արե՞լ եք։ Բացի այդ, երբ ասում եք, որ ջրառը լինելու է մինչև 245 մլն մ³, ավելի կոնկրետ որքա՞ն։ Ի վերջո, որքա՞ն հավելյալ ջուր եք վերցնելու»,-ԱԺ արտահերթ նիստում այսօր ջրային կոմիտեի նախագահ Կարեն Սարգսյանին հարցրեց «Պատիվ ունեմ» դաշինքի պատգամավոր Թագուհի Թովմասյանը։
Կարեն Սարգսյանը պատասխանեց․ «Մեր կանխատեսումներով՝ ջրապահանջարկը մինչեւ 75 միլիոն խորանարդ մետր է։ Իսկ բնապահպանների ահազանգի առնչությամբ պետք է դիտարկել, որ հունիսին շոգ պայմաններ էին, եւ տասն օրում ջրի մակարդակի 5 սանտիմետր նվազում է եղել, մինչդեռ ջրառը եղել է 0,5 սանտիմետր։ Մեր հաշվարկներով՝ աշնանացան ցորենի ծավալները կմեծանան»։
Թովմասյանն արձանագրեց՝ հասկանալի է, որ գյուղացիների հողատարածքների ոռոգման համար ջուր է պետք, բայց վերահսկողությունն էլ է կարեւոր․ «Ձեր պաշտոնը զբաղեցնող նախորդ անձը հայտարարում էր, որ տարվա ընթացքում 70% ջրի կորուստ կա»։ Կարեն Սարգսյանը նշեց․ «Չգիտեմ, թե ում մասին է խոսքը, չեմ կարող մեկնաբանել։ Իմ աշխատած ժամանակահատվածում ոռոգելի հեկտարներն ավելացել են»։
Հիշեցնենք, որ ԱԺ-ն այսօր արտահերթ նիստում առաջին ընթերցմամբ ընդունեց կառավարության հեղինակած՝ «Սեւանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան ու համալիր ծրագրերը հաստատելու մասին» օրենքում լրացումներ կատարելու մասին նախագիծը, որը ենթադրում է Սեւանից հավելյալ ջրառ։ Դեռեւս օգոստոսի 6-ին կառավարությունը հավանություն տվեց օրենքի նախագծին, որով ոռոգման նպատակով Սեւանա լճից 2021թ․-ի բացթողման 170 մլն մ³ չափաքանակը պետք է դարձվի մինչև 245 մլն մ³․ այդ նիստում հայտարարվել էր, որ Սեւանի ջրի մակարդակը նախորդ տարվա համեմատ 4 սանտիմետրով իջել է։ Մինչդեռ դեռեւս մայիսին վարչապետ Նիկոլ Փաշինյանը հայտարարել էր՝ շուտով սպասվում է իրենց կառավարման սենսացիոն նորություններից մեկը․ հունիս-հուլիս ամիսներին Սևանա լճի մակարդակն ամենաբարձրը կլինի վերջին 60 տարում։
Կարդացեք նաև
Լուիզա ՍՈՒՔԻԱՍՅԱՆ
