Սեւանա լճից ոռոգման նպատակով հավելյալ ջրառ ենթադրող օրենքի նախագծի քննարկման ժամանակ այսօր ԱԺ նիստում լճի պահպանման վերաբերյալ նախկիններին ուղղված մեղադրանքներ հնչեցին «Քաղաքացիական պայմանագրից» ելույթ ունեցողներից, ընդդիմադիր խմբակցությունների պատգամավորներն էլ բնապահպանների ահազանգերով, թվային տվյալներով պնդում էին, որ գործող իշխանությունն է թերացել։
«Հայաստան» դաշինքից Թադեւոս Ավետիսյանը նախ շեշտեց՝ գյուղացուն ջուր հասցնելը կարեւոր է, բայց կա մանիպուլյացիա․ «Ասում են, թե ջուրը որտեղի՞ց տան այն դեպքում, երբ տարին չորային է եղել։ Հետեւաբար, ջուրը պետք է տան Սեւանից։ Այս տրամաբանությամբ, եթե մի օր Սեւանը չեղավ․․․հիմա Հադրութն ու Շուշին հայկական չեն, եւ նման պարագայում ումի՞ց ենք ջուր վերցնելու, ո՞ւմ ենք մեղադրելու»։
Թադեւոս Ավետիսյանը դիմեց նախագիծը զեկուցող ջրային կոմիտեի նախագահ Կարեն Սարգսյանին, կարծիք հայտնեց, թե ջուր չլինելու համար վերջինս Աստծուն է մեղադրում․ «Իսկ դուք, ձեր կառավարությունն ամեն ինչ իդեալակա՞ն է արել։ Այստեղ ջուր տալու խնդիրը չի, այլ կառավարման ձախողումը։ Եղբայր, բա տնտեսական հեղափոխություն էիք անում, դրանից ի՞նչ կա։ Հերիք է մեղավորներ ման գաք։ Եվ հետո, պարոն Սարգսյան, այդքան գլուխ մի գովեք»։
ԱԺ-ն այսօր արտահերթ նիստ է անում՝ օրակարգում կառավարության հեղինակած՝ «Սեւանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան ու համալիր ծրագրերը հաստատելու մասին» օրենքում լրացումներ կատարելու մասին նախագիծը։ Դեռեւս օգոստոսի 6-ին կառավարությունը հավանություն տվեց օրենքի նախագծին, որով ոռոգման նպատակով Սեւանա լճից 2021թ․-ի բացթողման 170 մլն մ³ չափաքանակը պետք է դարձվի մինչև 245 մլն մ³․ այդ նիստում հայտարարվել էր, որ Սեւանի ջրի մակարդակը նախորդ տարվա համեմատ 4 սանտիմետրով իջել է։ Մինչդեռ դեռեւս մայիսին վարչապետ Նիկոլ Փաշինյանը հայտարարել էր՝ շուտով սպասվում է իրենց կառավարման սենսացիոն նորություններից մեկը․ հունիս-հուլիս ամիսներին Սևանա լճի մակարդակն ամենաբարձրը կլինի վերջին 60 տարում։
Լուիզա ՍՈՒՔԻԱՍՅԱՆ
