Ադրբեջանի նախագահ Իլհամ Ալիևը կնոջ՝ Մեհրիբան Ալիևայի հետ մեկնել է Արցախյան երկրորդ պատերազմի հետևանքով Բաքվի վերահսկողության տակ անցած Քարվաճառի և Բերձորի շրջաններ: Քարվաճառում Ադրբեջանի պետական դրոշը բարձրացնելու հանդիսավոր արարողության ժամանակ Ալիեւը կրկին հավակնություններ է ներկայացրել Հայաստանի Վարդենիսի շրջանի նկատմամբ՝ նշելով, որ դա «ադրբեջանական պատմական Բասարքեչար շրջանն է»:
«Այս ճանապարհն ուղիղ տանում է Բասարքեչարի շրջան: Այն Հայաստանում անվանում են Վարդենիսի շրջան: Բայց այդ շրջանի և մարզի իրական անվանումը Բասարքեչար է: Դա Գեյչա մահալն է՝ հին ադրբեջանական տարածք: 1930թ. Հայաստանի տարածքում ստեղծվել է Բասարքեչարի շրջանը: Դրա բնակիչների բացարձակ մեծամասնությունը եղել են ադրբեջանցիներ: Այդ թվում, Զոդի բնակիչները նույնպես եղել են ադրբեջանցիներ: Նրանք ենթարկվել են արտաքսման: Եվ միայն 1969թ. հունիսին Հայաստանը Բասարքեչարի շրջանը վերանվանել է Վարդենիսի շրջան: Ես խնդրում եմ՝ ռեպորտաժներում և ընդհանուր առմամբ մեր բառապաշարում պետք է կիրառել ոչ թե Վարդենիս, այլ վերականգնել Բասարքեչար անվանումը»,- ասել է Ալիևը:
Ալիեւը նաև նշել է, որ պատերազմի ժամանակ իրենց հաջողվել է Քարվաճառի շրջանում վերցնել ռազմավարական կարևորության բարձունքներ՝ կանխելով հայկական ուժերի վերադասավորումները:
«Մռավի լեռնաշղթայի տարածքում և նրա շրջակայում կատաղի մարտեր են ընթացել, մենք ունեցել են շեհիդներ: Բայց մենք վերցրինք ռազմավարական բարձունքներ, ինչը մեզ հնարավորություն տվեց վերահսկողություն սահմանել հայերի կողմից օգտագործվող տրանսպորտային-հաղորդակցային ենթակառուցվածքների վրա: Այդպիսով, վերցնելով ռազմավարական բարձունքներ Քելբաջարի հյուսիսային հատվածում՝ մենք կարողացանք զգալիորեն սահմանափակել հայկական զինված ուժերի շարժն այդ ուղությամբ, և նրանք փաստացի չկարողացան օգտվել Բասարքեչար-Քելբաջար (Վարդենիս-Քարվաճառ-խմբ.) ճանապարհից: Դա ռազմական հակահարձակողական գործողության հիմնական մասն էր»,- ասել է Ալիեւը:
Կարդացեք նաև
Նա նշել է, որ որոշ ուղղություններում ռազմական մանեւրումներով իրենց հաջողվել է կանխել հայկական զինված ուժերի վերադասավորումները: «Այդպիսով, Քելբաջարի մի մասը, փոքր մասը, ազատագրվել է մարտի դաշտում: Բայց հիմնական մասն ազատագրվել է արդեն Հայաստանի կապիտուլիացիոն ակտի ստորագրումից հետո»,- ասել է Ալիեւը:
Պատրաստեց Վիկտորյա ԱՆԴՐԵԱՍՅԱՆԸ
