ԱԺ-ն այսօր արտահերթ նիստ է անում. օրակարգում է կառավարության հեղինակած «Սեւանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան ու համալիր ծրագրերը հաստատելու մասին» օրենքում լրացումներ կատարելու մասին նախագիծը։
Դեռեւս օգոստոսի 6-ին կառավարությունը հավանություն տվեց օրենքի նախագծին, որով ոռոգման նպատակով Սեւանա լճից 2021թ․-ի բացթողման 170 մլն մ³ չափաքանակը պետք է դարձվի մինչև 245 մլն մ³․ այդ նիստում հայտարարվել էր, որ Սեւանի ջրի մակարդակը նախորդ տարվա համեմատ 4 սանտիմետրով իջել է։ Մինչդեռ դեռեւս մայիսին վարչապետ Նիկոլ Փաշինյանը հայտարարել էր՝ շուտով սպասվում է իրենց կառավարման սենսացիոն նորություններից մեկը․ հունիս-հուլիս ամիսներին Սևանա լճի մակարդակն ամենաբարձրը կլինի վերջին 60 տարում։
«Սեւան-Հրազդան ոռոգման համակարգը սնուցող գետերում ջրի կտրուկ նվազման հետեւանքով առաջացել է տարեկան պլանավորվածի հանդեպ 97, 53 միլիոն մետր խորանարդի ջրի դեֆիցիտ, որը լրացվել է Սեւանից բացթողումների, Ապարանի, Ազատի, Մարմարիկի ջրամբարների եւ մեխանիկական ջրարտադրության միջոցների հաշվին»,-հայտարարեց ՀՀ կառավարության ջրային կոմիտեի նախագահ Կարեն Սարգսյանը։ Նրա խոսքով՝ նախագիծը ստացել է ԳԱԱ-ի փորձագիտական դրական եզրակացությունը։
Կարդացեք նաև
«Քաղաքացիական պայմանագրից» Գեւորգ Պապոյանը հետաքրքրվեց՝ այս նախագծի արդյունքում ենթադրվո՞ւմ է, որ 31 000 հեկտար հողատարածք մշակող քաղաքացիներն այլեւս ոռոգման ջրի խնդիր չեն ունենա։ «Այո, կարողանալու ենք ջրամատակարարում իրականացնել։ Այդ ոռոգելի տարածքները ջրի խնդիր չեն ունենա»,-պատասխանեց Կարեն Սարգսյանը։
«Պատիվ ունեմ»-ից Թագուհի Թովմասյանը Կարեն Սարգսյանին հիշեցրեց Նիկոլ Փաշինյանի հետեւյալ խոսքերը՝ «դադարեք Սեւանա լճին վերաբերվել որպես ջրի տարա»։ Սարգսյանն արձագանքեց․ «Սեւանից բոլոր կառավարությունների ժամանակ հնարավորություն է եղել հավելյալ ջրառ իրականացնելու գյուղատնտեսության համար։ 2008-14թթ․ 303 միլիոն խորանարդ մետրով է ջրառ իրականացվել։ Քանի դեռ գյուղատնտեսության համար ստեղծված չեն դեֆիցիտը լրացնելու հնարավորություններ, դիմելու ենք Սեւանի օգնությանը։ Բայց կառավարությունը գյուղատնտեսության փրկության ծրագիր ունի՝ ջրամբարաշինությունը, որի արդյունքում կմոռանանք Սեւանից ոռոգման ջուր վերցնելու մասին»։
Լուիզա ՍՈՒՔԻԱՍՅԱՆ
