Մեկօրյա հանգստից հետո Ռումինիայի Յասի քաղաքում ընթացող շախմատի կանանց Եվրոպայի անհատական առաջնության մասնակիցները վերսկսել են պայքարը:
Յոթերորդ տուրից հետո Էլինա Դանիելյանը իր անվան դիմաց գրանցել է 5,5 միավոր եւ ընթանում է մրցաշարային աղյուսակի 3-րդ հորիզոնականում: Նա ընդամենը կես միավորով է հետ մնում երկու առաջատարներից: Ընդ որում, Էլինան մեր աղջիկներից միակն է, որը Յասիում ոչ մի պարտություն չի կրել:
Բազմափորձ Լիլիթ Մկրտչյանը 4,5 միավորով հավասարվել է Հայաստանի ազգային հավաքականում իր կրտսեր թիմակից Աննա Սարգսյանին: 4,0-ական միավոր ունեն Մարիա Գեւորգյանը եւ Սուսաննա Գաբոյանը, Մարիամ Մկրտչյանը վաստակել է 3,5 միավոր, իսկ Սիրանուշ Ղուկասյանը 3,0 միավորով առայժմ ամենահամեստ արդյունքն ունի Հայաստանի ներկայացուցիչների մեջ:
Աշոտ ՀԱԿՈԲՅԱՆ
