«ՀՀ-ն եւ Ուրուգվայը խորը եւ ջերմ բարեկամական հարաբերություններ ունեն։ Ուրուգվայը կարողացավ լինել այն հյուրընկալ անկյունը այն ժողովուրդների համար, որոնք նոր հորիզոն էին փնտրում իրենց ընտանիքի համար»,-լրագրողների հետ ճեպազրույցում այսօր հայտարարեց պաշտոնական այցով ՀՀ-ում գտնվող Ուրուգվայի Հանրապետության արտաքին հարաբերությունների նախարար Ֆրանսիսկո Բուստիժոն։
Նրա խոսքով՝ Հայոց ցեղասպանությունից հետո Ուրուգվայում հաստատված հայ համայնքը հրաշալի կերպով ինտեգրվել է իրենց երկրի հասարակությանը։ Ֆրանսիսկո Բուստիժոն շեշտեց, որ հայ-ուրուգվայական հարաբերությունները զարգացնելու, մշակութային կապերը խորացնելու ցանկություն ունեն։
«Ուրուգվայը որպես ՄԱԿ-ի անդամ եւ վերջինիս արժեքների պաշտպան՝ դժվար ժամանակահատվածում, երբ տարածաշրջանում խաղաղությունն ու անվտանգությունը կասկածի տակ են տարբեր հակամարտությունների պատճառով, իր անհանգստությունն է հայտնել միջազգային հանրությանն առ այն, որ հակամարտությունները պետք է լուծվեն առանց բռնության։ Մեր երկրների միջեւ երեսուն տարվա հարաբերությունները հաշվի առնելով՝ Ուրուգվայը որոշել է ՀՀ-ում դեսպանություն բացել։ Մեր ճանապարհը դեռ շարունակվելու է միասին։ Հուսանք, որ ապագայի տեսլականը նույնն է, եւ այն կունենան նաեւ մեր սերունդները»,-հավելեց պաշտոնյան։
Լուիզա ՍՈՒՔԻԱՍՅԱՆ
