Ուրուգվայի Հանրապետության արտաքին հարաբերությունների նախարար Ֆրանսիսկո Բուստիժոն այս օրերին պաշտոնական այցով ՀՀ-ում է։ ՀՀ ԱԳ նախարարի պարտականությունները կատարող Արմեն Գրիգորյանի խոսքով՝ այս այցը վերահաստատում է հայ-ուրուգվայական բարեկամական ջերմ կապերը։
Ուրուգվայցի պաշտոնյանի հետ հանդիպման ավարտին այսօր Արմեն Գրիգորյանը լրագրողների հետ ճեպազրույցում շեշտեց, որ 1965թ․-ին Ուրուգվայն առաջինը պաշտոնապես ճանաչեց Հայոց ցեղասպանությունը՝ դրանով վերահաստատելով համամարդկային արժեքների եւ մարդու հիմնարար իրավունքների ջատագովի իր համբավը։
«Հայաստանը մեծապես գնահատում է 2020թ․-ի աշնանը Արցախի դեմ ադրբեջանաթուրքական ագրեսիայի վերաբերյալ Ուրուգվայի սկզբունքային դիրքորոշումը։ Ի թիվս այլ երկրների՝ Ուրուգվայի օրենսդիր մարմինը դատապարտեց արցախյան հակամարտությունում Թուրքիայի կողմից վարձկանների ներգրավումը եւ Ադրբեջանի կողմից մարդու իրավունքների խախտման, քաղաքացիական ենթակառուցվածքների ռմբակոծման դեպքերը։ Հայերի եւ ուրուգվայցիների միջեւ շարունակաբար ամրապնդվող կապը հնարավորություն է տալիս հաղթահարել մեզ բաժանող կիլոմետրերը։ Ցավոք, Արցախի ժողովրդի ինքնորոշման եւ գոյության իրավունքի դեմ սանձազերծված պատերազմի հետեւանքները դեռ ամբողջովին չեն հաղթահարվել։ ՀՀ-ն եւ Արցախը բախվում են անվտանգային խնդիրների։ Հայ ռազմագերիները դեռեւս չեն հայրենադարձվել։ Այս պարագայում շարունակում ենք ապավինել մեր բարեկամ երկրների, այդ թվում՝ Ուրուգվայի համերաշխությանը։ Այսօր հաստատեցինք, որ որ հայ-ուրուգվայական հարաբերությունները զարգանում են»,-նշեց Արմեն Գրիգորյանը։
Լուիզա ՍՈՒՔԻԱՍՅԱՆ
