Երևանի ընդհանուր իրավասության դատարանի Կենտրոնի նստավայրում դատավոր Մեսրոպ Մակյանի նախագահությամբ այսօր «Նորքի զինված խմբի» գործով դատական նիստն էր։
Դատավոր Մեսրոպ Մակյանը հայտնեց, որ ամբաստանյալներից Վահան Շիրխանյանի առողջական վիճակը երեկ կտրուկ վատացել է, ուստի նա չի ներկայացել դատարան եւ ինչպես նրա կինն է տեղեկացրել դատարանին, նրա մոտ նախաինստուլտային նշաններ են։ Շիրխանյանի պաշտպան Հայկ Ալումյանը խնդրեց նիստը դռնփակ անցկացնել, որպեսզի տեղեկացնի Վահան Շիրխանյանի առողջության մասին մանրամասները։
Այսօր դատարանում պետք է սկսվեր ամբաստանյալների հարցաքննությունը, սակայն դատավորը որոշեց նիստը հետաձգել։
Հիշեցնենք, որ 2015-ի նոյեմբերի 25-ին ԱԱԾ-ն հայտարարություն տարածեց այն մասին, որ Նորք–Մարաշում վնասազերծվել է զինված խումբ: Ըստ մեղադրանքի՝ Արթուր Վարդանյանի գլխավորած՝ 2015 թվականին Նորք-Մարաշում վնասազերծված 20 հոգանոց զինված խումբը ծրագրել էր բռնությամբ զավթել իշխանությունը: Մասնավորապես, թռիչքի պահին խոցել նախագահի օդանավը, հարձակում գործել ՀՀ նախագահի նստավայրի, Ազգային ժողովի, Սահմանադրական դատարանի, ՀՀ կառավարության, Հանրային հեռուստաընկերության եւ այլ հաստատությունների շենքերի վրա:
Կարդացեք նաև
Ըստ մեղադրական եզրակացության՝ Արթուր Վարդանյանը 2015թ. ապրիլից ստեղծել ու ղեկավարել է ՀՀ քաղաքացիներից կազմված հանցավոր համագործակցություն, կազմակերպված խմբի կազմում ապօրինի կերպով ձեռք է բերել, պահել, փոխադրել և կրել մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր` նպատակ ունենալով Հայաստանի Հանրապետությունում իշխանությունը յուրացնել: Այսինքն` զավթել` բռնություն գործադրելու կամ բռնություն գործադրելու սպառնալիքով, ինչը ավարտին չի հասցվել նրա կամքից անկախ հանգամանքներում, քանի որ հանցավոր համագործակցության մեջ ներգրավված անձինք բացահայտվել ու 2015թ. նոյեմբերի 25-ին վնասազերծվել են Հայաստանի Հանրապետության ազգային անվտանգության ծառայության աշխատակիցների կողմից:
Նելլի ԲԱԲԱՅԱՆ
Լուսանկարը՝ արխիվային
