Ադրբեջանի արտաքին գործերի նախարարությունը հայտարարություն է տարածել, որով անդրադառնում է Հայաստանի ԱԳՆ-ի՝ օգոստոսի 11-ի հայտարարությանը։
Հիշեցնենք՝ հայկական ԱԳՆ-ն իր հաղորդագրությունում նշել էր. «Ադրբեջանական կողմն իր ագրեսիվ գործողությունները փորձում է քողարկել մի կողմից հայկական կողմին մեղադրելով նոյեմբերի 9-ի եռակողմ հայտարարության խախտումների մեջ, իսկ մյուս կողմից բացահայտ կերպով խեղաթյուրում է հենց նույն նոյեմբերի 9-ի հայտարարությունը»։
Ըստ Ադրբեջանի ԱԳՆ-ի՝ Հայաստանը փորձ է անում խուսափել եռակողմ հայտարարության դրույթների իրականացման իր պարտավորություններից։
Նրանք մեջբերել են եռակողմ հայտարարության առաջին կետը, ըստ որի «կողմերը կանգ են առնում իրենց զբաղեցրած դիրքերում». «Պետք է ընդգծել, որ «կանգ առնել»՝ չի նշանակում մնալ՝ ոչ այս, ոչ էլ որևէ այլ համատեքստում։ Սա վերաբերում է ինչպես ռուսերենին, որով կազմվել է հայտարարությունը, այնպես էլ այլ լեզուների էլ»։
Կարդացեք նաև
Ադրբեջանի ԱԳՆ-ն մեջբերել է եռակողմ հայտարարության 3-րդ, 4-րդ և 6-րդ կետերը. «Այսպիսով՝ 2020 թվականի նոյեմբերի 10-ին ստորագրված եռակողմ հայտարարության համաձայնեցրած ձևակերպումները պարզ խոսում են Ադրբեջանի տարածքից հայկական զինված ուժերի դուրս բերման մասին, և ոչ մի կերպ չեն նախատեսում զինծառայողների տեղափոխում և տեղաբաշխում»։
Ադրբեջանի ԱԳՆ-ի խոսքով՝ հայկական կողմը «կա՛մ ամբողջությամբ չի ընկալել եռակողմ հայտարարության էությունը, կա՛մ էլ մտադիր չէ իրականացնել նրա պահանջները». «Այս կործանարար գործելակերպը զուրկ է տարածաշրջանում երկար սպասված խաղաղություն հաստատելու հեռանկարից»։
Պատրաստեց Ամի ՉԻՉԱԿՅԱՆԸ
