Կառավարության այսօրվա նիստում որոշում ընդունվեց կառավարության պահուստային ֆոնդից 16,9 միլիոն դրամ հատկացնել Սահմանադրական դատարանի աշխատակազմին՝ ՍԴ նախկին դատավոր Ալվինա Գյուլումյանին չվճարված հավելավճարի գումարը փոխհատուցելու համար։
Որոշման հիմնավորման մեջ նշված է՝ ՀՀ վճռաբեկ դատարանն իր 2021 թվականի հունիսի 11-ի որոշմամբ մասնակիորեն բավարարել է ՍԴ նախկին դատավոր Ալվինա Գյուլումյանի վճռաբեկ բողոքը եւ պարտավորեցրել ՍԴ աշխատակազմի ղեկավարին` Ալվինա Գյուլումյանին 09.04.2018 թվականից մինչեւ 26.06.2020 թվականն ընկած ժամանակահատվածի համար լրացուցիչ վճարել հավելավճար՝ ամսական 601,943.0 դրամի չափով: Նշված ժամանակահատվածի համար վճարման ենթակա գումարը կազմում է շուրջ 16.9 միլիոն դրամ:
Նույն հիմնավորման մեջ նաեւ նշված է, որ ՀՀ պետական բյուջեով ՀՀ Սահմանադրական դատարանին հատկացված միջոցների հաշվին նշված գումարի վճարումը կատարելու անհնարինության պատճառով, ՀՀ սահմանադրական դատարանի նախագահը դիմել է ՀՀ վարչապետին` նշված գումարը ՀՀ կառավարության պահուստային ֆոնդից հատկացնելու նպատակով:
Նելլի ԲԱԲԱՅԱՆ
