Ճանապարհային ուղիների ապաշրջափակման դեպքում արդյոք պարզ է, թե ՀՀ-ի որ տարածքում ինչ պետք է կառուցվի, գործընթացն ինչպես է լինելու։ Այսօր կառավարության նիստից հետո լրագրողների հետ ճեպազրույցում տարածքային կառավարման եւ ենթակառուցվածքների նախարար Գնել Սանոսյանը պատասխանելով այս հարցին, ասաց՝ ապաշրջափակումը վերաբերում է երկու երկրներին, երկուսն էլ համաչափ ձեւով պետք է ապաշրջափակեն տրանսպորտային ուղիները եւ սկսվի հաղորդակցություն, որից կշահի ոչ միայն ՀՀ-ն, այլեւ մեր հարեւան երկրները․ «Առանց ենթակառուցվածքների կառուցման չենք կարող ունենալ ապաշրջափակում, որովհետեւ ունենք հատվածներ, որտեղ երկաթուղու նախկին ցանցը չկա, եւ պետք է նորը կառուցվի»։
Թե որ ուղղությամբ է գործելու երկաթուղին, Գնել Սանոսյանն ասաց՝ բոլորին է հայտնի՝ երկաթուղին անցնում է Նախիջեւանով, Մեղրիով, եթե որոշվի, որ երկաթուղին պետք է շահագործել. «Խորհրդային տարիներին եղել է երկաթուղի նաեւ Իջեւանով։ Ենթադրյալ կարող է, եթե տարածաշրջանում այնպիսի խաղաղություն լինի եւ ամբողջովին կարողանանք ապաշրջափակել եւ տնտեսապես նաեւ ձեռնտու կլինի այդ ուղղությունն էլ աշխատեցնել»։
Սահմանազատման եւ սահմանագծման արդյունքում ՀՀ-ն տարածքային նոր զիջումներ ունենալո՞ւ է, ի պատասխան այս հարցի, պարոն Սանոսյանն ասաց՝ դա բավական երկար տեւող երեւույթ է․ «Մենք, չգիտես ինչու, անընդհատ զիջումների մասին ենք խոսում, բայց չենք խոսում, որ այդ երեւույթի պարագայում կարող են մեր որոշ տարածքներ վերադարձվեն մեզ։ Բոլոր տարածքների մասին խոսում ենք, բացի Արծվաշենից, ես առաջինը Արծվաշենի մասին կխոսեի։ Տեսնենք զարգացումները տարածաշրջանում ինչպես կընթանան։ Ինչո՞ւ ենք մենք պատկերացնում, որ Տիգրանաշենի մասին կարող ենք անընդհատ խոսել, իսկ Արծվաշենի մասին՝ ոչ։ Եթե աշխարհագրական դիրքով նայենք, բավական նման են»։
Կարդացեք նաև
Նելլի ԲԱԲԱՅԱՆ
