ԱԺ լիագումար նիստում այսօր աշխատանքի եւ սոցիալական հարցերի մշտական հանձնաժողովի նախագահի պաշտոնում «Քաղաքացիական պայմանագրից» առաջադրված թեկնածու Հերիքնազ Տիգրանյանին, երբ «Հայաստան» դաշինքի պատգամավոր Արծվիկ Մինասյանը հարցրեց՝ ի՞նչ կարծիքի է իրենց դաշինքի այն առաջարկի մասին, որ կառավարական ամառանոցները վերածվեն վիրավոր զինվորների վերականգնողական կենտրոնի, Տիգրանյանը, ինչպես հայտնել էինք, պատասխանել էր՝ «անընդհատ դա վկայակոչելն ամբոխահաճություն է»։
Այս առիթով ԱԺ փոխնախագահ Ռուբեն Ռուբինյանը Տիգրանյանին հարցրեց․ «2018թ․ ապրիլին, երբ ՀՅԴ-ն կառավարությունում ներկայացված էր, գործադիրի որոշմամբ՝ կառավարական ամառանոցի մի տուն նվիրվեց Սերժ Սարգսյանին։ Հետո, հեղափոխական գործընթացներին զուգահեռ, այդ որոշումը չեղարկվեց, եւ դա լավ է, որովհետեւ կառավարական ամառանոցները կլինեին ոչ թե հանրային սեփականություն, այլ մասամբ կլինեին այդպիսին։ Մյուս մասը կլիներ Սերժ Սարգսյանի սեփականությունը։ Եթե այդ ժամանակ դուք կառավարության անդամ լինեիք, կողմ կլինեի՞ք։ Եթե չեմ սխալվում, ՀՅԴ-ն, այդ թվում՝ Արծվիկ Մինասյանը, առնվազն հանրայնորեն դեմ չեն արտահայտվել այդ որոշմանը»։ Հերիքնազ Տիգրանյանը պատասխանեց, որ, բնականաբար, դեմ կլիներ․ «Դա հանրային գույք է եւ չպետք է մեկ անձի բարեկեցությանը ծառայի»։
Հիշեցնենք, որ 2018թ․-ին Սերժ Սարգսյանը որոշում էր կայացրել, որ այլևս չի բնակվելու կառավարական ամառանոցում և ողջամիտ ժամկետում դուրս կգա այդ տարածքից։
Կարդացեք նաև
Լուիզա ՍՈՒՔԻԱՍՅԱՆ
