Հանրային շրջանակներից «Հայաստան» խմբակցության պատգամավոր Արմեն Գեւորգյանն ահազանգեր է ստանում, որ Հայաստանում թրաֆիքինգի ոլորտով ցուցանիշերը լուրջ նահանջ են արձանագրում, մասնավորաբար, աշխատանքային իրավունքների եւ երեխաների շահագործվան մասով: Այս մասին նա հայտարարեց այսօր խորհրդարանում, ԱԺ Մարդու իրավունքների պաշտպանության եւ հանրային հարցերի մշտական հանձնաժողովի նախագահի պաշտոնում «Պատիվ ունեմ» խմբակցության անդամ Թագուհի Թովմասյանի թեկնածության հարցի քննարկման ժամանակ:
Արմեն Գեւորգյանը հիշեցրեց` 2012-14 թ.թ. ՀՀ կառավարության պայքարը բավականին բարձր էր գնահատել ԱՄՆ Պետդեպի կողմից. «Մենք այդ ժամանակ զեկույցի առաջին սանդղակում էինք, մինչդեռ վերջին տարիներին նահանջ է արձանագրվում, իսկ հատկապես այս տարվա Պետդեպի զեկույցում Հայաստանն, առհասարակ, հայտնվել է 2-րդ խմբի մոնիտորինգի ցանկում»:
Թագուհի Թովմասյանն ասաց, որ ընտրվելու դեպքում, խնդիրը իր թիրախային առաջնահերթություններում նկատի կունենա. «Ընտանեկան արժեքներով ապրող փոքրիկ պետության ներսում այս ոլորտը պիտի պառլամենտական վերահսկողության լուրջ ազդեցություն ունենա»:
«Հայաստան» խմբակցության պատգամավոր Գեղամ Նազարյանն էլ նկատեց, որ կորոնավիրուսի տարածմանը զուգահեռ ամբողջ աշխարհում կարծես խնդիր է դրվել խախտել մարդու ամենակարեւոր իրավունքը՝ կամքի ազատությունը: Հայաստանում նույնական է՝ այս միտումը կա. «Պետական կառույցներում աշխատակցին պարգեւավճար չտալու սպառնալիքով հարկադրում են պատվաստվել կորոնավարակի դեմ: Մինչդեռ իմ կարծիքով՝ այս սպառնալիքներն ու հարկադրանքը հակազդեցություն են առաջացնում: Ուշադրության կենտրրոնում պահելո՞ւ եք այս պարտադրանքի խնդիրը, եւ Ձեր կարծիքով մարդն ազա՞տ է իր որոշումներում՝ ի վերջո ինքն ընտրի, թե պայքարի ինչ մեթոդ է նախընտրում համավարակի դեմ եւ պե՞տք է 17-19 տարեկաններին պարտադրել պատվաստվել»:
Կարդացեք նաև
«Կորոնավարակի բռնապետությամբ ապրելն անտանելի է, բայց պետությունն էլ իր խնդիրն ունի՝ պետք է մարդու անվտանգ ապրելու պայմանները երաշխավորի: Այս հարցում թատրոնի տոմսերով շահագրգռելն այդ այլըտրանքը չէ, որը պարտադրում է պատվաստվել»,- եղավ Թագուհի Թովմասյանի պատասխանը:
Նելլի ԳՐԻԳՈՐՅԱՆ
