ՀՀ Ազգային ժողովի «Քաղաքացիական պայմանագիր» խմբակցությունը ԱԺ առողջապահության հարցերի մշտական հանձնաժողովի նախագահի պաշտոնում առաջադրեց նույն խմբակցության պատգամավոր Նարեկ Զեյնալյանի թեկնածությունը:
Իր ելույթում Նարեկ Զեյնալյանն ասաց, որ նախորդ 2,5 տարիների ընթացքում բավականաչափ աշխատանք է իրականացվել, սակայն 1,5 տարին շատ լարված է եղել՝ կապված կորոնավիրոսի համավարակով, պատերազմով եւ դրա հետեւանքներով․ «Համավարակը մարտահրավեր էր ամբողջ երկրագնդի համար՝ անկախ առողջապահական համակարգի զարգացման աստիճանից՝ որեւէ երկիր պատրաստ չէր համավարակին, նրա հետեւանքներին դիմագրավելուն եւ պատշաճ հակազդելուն: Շատ ավելի զարգացած, կայացած առողջապահական համակարգեր ունեցող երկրներում համաճարակային իրավիճակն ավելի անբարենպաստ էր, քան Հայաստանում: Դժբախտաբար, ունեցանք նաեւ պատերազմի հետեւանքներ եւ առողջապահական համակարգի համար բացվեց երկրորդ ճակատը: Վստահեցնում եմ՝արվել է առավելագույնը, որպեսզի մեղմվի համավարակի ազդեցությունը, պատշաճ պայքար տարվի, առավելագույնը, որպեսզի վիրավոր զինվորները ստանան պատշաճ բուժօգնություն, միաժամանակ պատշաճ ձեւով սպասարկվի քաղաքացիական բնակչությունը»։
Նարեկ Զեյնալյանը ներկայացրեց, թե ինչ է արվել համավարակի դեմ պայքարում, որքան բուժհաստատություն է ներգրավվել, ասաց, որ ծախսվել է 39 մլրդ դրամ։ Հիշեցրեց, որ ընդունվել է առողջապահության մայր օրենքը՝ «Բնակչության բժշկական սպասարկման մասին» օրենքը։ Ապա Զենյալյանը նշեց, որ նախատեսվում է 2023 թվականին ներդնել առողջության համապարփակ ապահովագրությունը։
«Հայաստան» դաշինքի պատգամավոր Արմեն Գեւորգյանը հետաքրքրվեց ապահովագրության մասին նախաձեռնությունից, ինչին ի պատասխան Զեյնալյանն ասաց, որ կա նախնական մշակված ռազմավարություն, այն կքննարկեն նաեւ ընդդիմադիր խմբակցությունների հետ․«Նախատեսվում է պետական համակարգի ներդրում, նաեւ որոշակի պահումներ աշխատավարձից եւս կնախատեսվեն, չափը կքննարկենք, միասին, կհաշվարկենք»։
Կարդացեք նաև
Նելլի ԲԱԲԱՅԱՆ
