«Դուք այն պաշտոնյաներից եք, որը բարձր, պատասխանատու պաշտոն է զբաղեցրել թե Ռոբերտ Քոչարյանի, թե Սերժ Սարգսյանի նախագահության շրջանում։ Հիշում եմ, որ 2014թ․-ին մի տնտեսական բանավեճ սկսվեց Ռոբերտ Քոչարյանի գրասենյակի եւ այդ ժամանակվա վարչապետ Տիգրան Սարգսյանի միջեւ»,-ԱԺ տարածաշրջանային եւ եվրասիական ինտեգրման հարցերի մշտական հանձնաժողովի նախագահի պաշտոնում «Հայաստան» դաշինքից առաջադրված թեկնածու, ՀՀ նախկին փոխվարչապետ Արմեն Գեւորգյանից այսօր ԱԺ լիագումար նիստում հետաքրքրվեց «Քաղաքացիական պայմանագրի» պատգամավոր Բաբկեն Թունյանը։ Նա շարունակեց․ «Բանավեճը սկսվեց նրանից, որ Տիգրան Սարգսյանը հայտարարեց՝ 2000-ականների երկնիշ աճը շինարարական փուչիկ է, որը պայթեց եւ փլատակների տակ թողեց մեր տնտեսությունը։ Հաջորդեց Ռոբերտ Քոչարյանի գրասենյակի բավականին կոշտ պատասխանը։ Եթե չեմ սխալվում, ասվեց, որ թերարժեք վարչապետը շռայլություն է մեր երկրի համար։
Սրան ի պատասխան Տիգրան Սարգսյանը գրաֆիկներով հիմնավորեց շինարարական փուչիկը։ Հաջորդեցին կոշտ քննադատություններ եւ անդրադարձ եղավ հատկապես գազային պայմանագրին։ ԶԼՄ-ները գրում էին, որ գազի գինը սահմանին թանկացել է, եւ կառավարությունը հետեւողականորեն հերքում էր։ Հետո պարզվեց, որ մենք 300 միլիոն դրամի պարտք ենք կուտակել «Գազպրոմ»-ին, եւ դրա դիմաց որոշակի էներգետիկ ակտիվներ անցան «Գազպրոմ»-ին։
Ռոբերտ Քոչարյանն այդ պայմանագրի մասին ասել էր, որ այդ որոշման հետեւանքով կառավարությունն ամբողջությամբ հեռացավ ընկերության կառավարումից եւ դիտորդի իրավունքը միայն մնաց։ Նա ծայրահեղ խոցելի էր համարել համաձայնագիրը, մասնավորապես՝ այն դրույթը, որ մինչեւ 2043թ․-ը «Հայռուսգազարդը» դառնում է դեպի ՀՀ գազի ներմուծման մոնոպոլիստ․․․պարոն Գեւորգյան, Հիմա դուք ավելի շատ ո՞ր դիրքորոշման հետ եք համաձայն։ Երկուստեք լուրջ մեղադրանքներ են հնչել»։ Արմեն Գեւորգյանը նախ նշեց՝ երկար ժամանակ է անցել, մանրամասները չի հիշում, բայց այդ ժամանակ, լինելով կառավարության անդամ՝ փոխվարչապետ, անձամբ քննարկում է ունեցել Տիգրան Սարգսյանի հետ․ «Այնուամենայնիվ, մենք մնացել ենք տարբեր կարծիքների այդ գնահատականի հետ կապված։ Տարբեր հանգամանքներ են ազդել, իմ կարծիքով, նման գնահատականներ հնչեցնելու վրա»։
Կարդացեք նաև
Լուիզա ՍՈՒՔԻԱՍՅԱՆ
