«Ձեր ճակատագիրը սերտ կապված է եղել Սերժ Սարգսյանի եւ Ռոբերտ Քոչարյանի կառավարման տարիների հետ՝ այն պահից, երբ դուք եւ Վիգեն Սարգսյանը ուսումնառությունից հետո եկաք ՀՀ եւ գուցե միանգամից ընդգրկվեցիք որոշակի գործառույթներում։ Ձեր 2018թ․-ի հայտարարագրում ասված է, որ դուք փոխառությամբ՝ պարտքով տվել եք 200 հազար դոլար եւ 90 միլիոն դրամ։ Բացատրեք, ի՞նչ գումարներ են սրանք»,-ԱԺ տարածաշրջանային եւ եվրասիական ինտեգրման հարցերի մշտական հանձնաժողովի նախագահի պաշտոնում «Հայաստան» դաշինքից առաջադրված թեկնածու, ՀՀ նախկին փոխվարչապետ Արմեն Գեւորգյանից այսօր ԱԺ լիագումար նիստում հետաքրքրվեց «Քաղաքացիական պայմանագրի» պատգամավոր Անդրանիկ Քոչարյանը։
Նա շարունակեց․ «Որքան հասկանում եմ՝ 96թ․-ից միայն պետական պաշտոններ եք զբաղեցրել։ Բացի այդ, վերջերս դատարանը որոշել էր ձեզ բերման ենթարկել նիստերի դահլիճ։ Կհիշեցնե՞ք՝ ի՞նչ քրեական գործի շրջանակում։ Եվ ճի՞շտ են հրապարակումներն այն մասին, որ ձեր կինը Չեխիայում ունի անշարժ գույքի վաճառքով զբաղվող ընկերություն»։
Արմեն Գեւորգյանը պատասխանեց․ «Չգիտեմ, թե որ թվականի հայտարարագիրն եք նայել, բայց դա այն աշխատավարձն է, որը ստացել եմ Հայաստանի զարգացման ծրագրերի իրականացման հիմնադրամում։ Քրեական գործից տեղեկացնելու կարիք չկա, կարծում եմ՝ մամուլից տեղյակ եք։ Իսկ կնոջս հետ կապված՝ այո, դա ճիշտ է։ 2016թ․-ին գրվել է այդ մասին, չի հերքվել»։
Քոչարյանը ճշտեց՝ այսինքն, որեւէ կոռուպցիոն բան չկա՞ այս ամենի մեջ։ «Ոչ»,-պատասխանեց Արմեն Գեւորգյանը։
Կարդացեք նաև
Լուիզա ՍՈՒՔԻԱՍՅԱՆ
