«Մարդիկ, որոնք մեզանից պահանջում են ներկայացնել մեր թողած բանակցային ժառանգությունը, պատկերացնում են, որ «Հայոց պատմության» դասագիրքը պետք է գրել թուրքական հ/կ-ների հետ միասին։ Ու երբ այս մարդը խոսում է հայկական շահից եւ հայկական բանակցային ժառանգությունից, ինձ մոտ դիսոնանս է առաջանում»,-ԱԺ լիագումար նիստում այսօր հայտարարեց «Պատիվ ունեմ» դաշինքից Աննա Մկրտչյանը։
Հիշեցնենք, որ «Պատմության ուսուցումը Թուրքիայի և Հայաստանի դպրոցներում. քննադատություն և այլընտրանքներ» աշխատության ստեղծմանը մասնակցել են նաեւ իշխանական պատգամավորներ Մարիա Կարապետյանն ու Սոս Ավետիսյանը։
Ելույթի վերջում Աննա Մկրտչյանը, դիմելով իշխանությանն ասաց․ «․․․Ամենաթողության հեղինակը ՀՀ-ն եւ Արցախն ավերած, կապիտուլյանտ Նիկոլն է»։
ԱԺ նախագահ Ալեն Սիմոնյանը հրահանգեց անջատել խոսափողը, բայց պատգամավորն արդեն ելույթն ավարտել էր։
Կարդացեք նաև
Դահլիճում աղմուկ բարձրացավ։ Ալեն Սիմոնյանը հայտարարեց, որ պատգամավորին հեռացնում է նիստերի դահլիճից եւ այսօրվա ընթացքում զրկում դահլիճում ներկա գտնվելու իրավունքից։ Աննա Մկրտչյանը դուրս եկավ։
Հիշեցնենք, որ «Նիկոլ», «կապիտուլյանտ» բառերի համար Աննա Մկրտչյանն ավելի վաղ կրկին նկատողություն էր ստացել։
Լուիզա ՍՈՒՔԻԱՍՅԱՆ
